உலகின் மிக மோசமான காற்று மாசடைந்த நகரமாக மாறிய டெல்லி

இந்தியாவின் தலைநகரான டெல்லி, பாகிஸ்தானின் லாகூரை முந்தி உலகின் மிக மோசமான காற்று மாசடைந்த நகரமாக மாறியுள்ளது.

டெல்லியில் காற்றின் தரம் அபாயகரமான நிலையை எட்டியுள்ளதுடன், அடர்த்தியான புகைமூட்டம் காரணமாக நகரின் பார்வைத்திறனும் வெகுவாகக் குறைந்துள்ளது.

சுமார் 2 கோடி மக்கள் வசிக்கும் டெல்லியில், வெள்ளிக்கிழமை (13) காற்றின் தரக் குறியீடு (AQI) 334 ஆகப் பதிவாகியுள்ளதாக சுவிட்சர்லாந்தைச் சேர்ந்த IQAir நிறுவனம் தெரிவித்துள்ளது.

இதன்படி, உலகின் முக்கிய நகரங்களில் மிகவும் மோசமான காற்றுத் தரத்தைக் கொண்ட நகரமாக டெல்லி முதலிடத்தைப் பிடித்துள்ளது.

அதேவேளை, இந்தியாவின் மத்திய மாசுக் கட்டுப்பாட்டு வாரியம் வெளியிட்டுள்ள தரவுகளின்படி, டெல்லியின் காற்றுத் தரக் குறியீடு 403 ஆகப் பதிவாகியுள்ளது. இது ‘மிகவும் மோசமான’ (Severe) நிலையாக வகைப்படுத்தப்பட்டுள்ளது.

பொதுவாக, காற்றுத் தரக் குறியீடு 50 வரை இருப்பது நல்ல நிலையாகக் கருதப்படுவதுடன், அதனால் உடல்நலத்துக்கு ஏற்படும் பாதிப்புகளும் மிகக் குறைவாக இருக்கும் எனத் தெரிவிக்கப்படுகிறது.

சுவிட்சர்லாந்தின் IQAir நிறுவனமும் இந்தியாவின் மத்திய மாசுக் கட்டுப்பாட்டு வாரியமும் வெளியிட்டுள்ள காற்றுத் தரக் குறியீடுகளில் வேறுபாடுகள் காணப்படுகின்றன. இதற்குக் காரணம் இரு நிறுவனங்களும் வெவ்வேறு அளவீட்டு முறைகளையும் கணக்கீட்டு நடைமுறைகளையும் பயன்படுத்துவதாகும்.

இதற்கிடையில், டெல்லியின் முக்கிய வீதிகளில் அடர்த்தியான புகைமூட்டம் சூழ்ந்துள்ளதால் வாகனங்களும் மோட்டார் சைக்கிள்களும் மங்கலான சூழலில் பயணிக்கும் நிலை ஏற்பட்டுள்ளது. சில பகுதிகளில் வீதி மின்விளக்குகள்கூட புகைமூட்டத்தால் மறைக்கப்பட்டுள்ளதாகத் தெரிவிக்கப்படுகிறது.

வட இந்தியா மற்றும் அண்டை நாடான பாகிஸ்தானின் பல பகுதிகளில் குளிர்காலம் ஆரம்பமாகும் காலப்பகுதியில் காற்று மாசடைதல் தீவிரமடைவது வழக்கமாகும்.

குளிரான மற்றும் அடர்த்தியான காற்று காரணமாக வாகனங்களிலிருந்து வெளியேறும் புகை, கட்டுமானப் பணிகளால் உருவாகும் தூசு மற்றும் விவசாயக் கழிவுகளை எரிப்பதால் ஏற்படும் புகை ஆகியவை வளிமண்டலத்தில் தேங்குவதால் இந்த நிலை உருவாகிறது.

இதனால், டெல்லி உள்ளிட்ட வட இந்தியப் பகுதிகளில் காற்றின் தரம் கடுமையாகப் பாதிக்கப்பட்டு, பொதுமக்களின் சுகாதாரத்துக்கும் அச்சுறுத்தல் ஏற்பட்டுள்ளதாக தெரிவிக்கப்படுகிறது.