ஆஸ்திரேலியாவில் புலம்பெயர்வோர் எண்ணிக்கையைக் குறைக்க ‘One Nation’ அழுத்தம்

ஆஸ்திரேலியாவுக்கான நிகர வெளிநாட்டு புலம்பெயர்வோரின் (Net Overseas Migration) எண்ணிக்கையை ஆண்டிற்கு 1.3 லட்சமாக (1,30,000) கணிசமாகக் குறைக்கும் தனது திட்டத்தை ‘வன் நேஷன்’ (One Nation) கட்சி உறுதிப்படுத்தியுள்ளது.

ஆஸ்திரேலியா சந்தித்து வரும் வீடுகள் பற்றாக்குறை மற்றும் சேவைத் துறைகளில் உள்ள நெரிசல், குறிப்பாகப் புறநகர்ப் பகுதிகளில் நிலவும் அழுத்தங்கள் காரணமாக, புலம்பெயர்வு அளவுகள் குறித்த விவாதம் அந்நாட்டு அரசியலில் மிக முக்கியப் விவாதப் பொருளாக மாறியுள்ளது.

இருப்பினும், வீடுகள் பற்றாக்குறைக்கு புலம்பெயர்ந்தோரை அரசியல் கட்சிகள் பழிகூறுவது ஆபத்தானது எனப் புலம்பெயர்வுத் துறை நிபுணர்கள் எச்சரித்துள்ளனர். தேவைப்படும் புதிய வீடுகளைக் கட்டி முடிக்க புலம்பெயர்ந்த தொழிலாளர்களின் பங்களிப்பு மிகவும் அவசியமானது என்றும் அவர்கள் வாதிடுகின்றனர்.

நிகர வெளிநாட்டுப் புலம்பெயர்வு என்பது, ஆஸ்திரேலியாவிற்குள் வருபவர்கள் மற்றும் நாட்டிலிருந்து வெளியேறுபவர்களின் எண்ணிக்கையை அடிப்படையாகக் கொண்டு கணக்கிடப்படுகிறது. இதில் தாயகம் திரும்பும் ஆஸ்திரேலியர்களும் அடங்குவர்.

மேலும் இந்த அளவீட்டில் சுற்றுலாப் பயணிகள், குடும்ப மற்றும் துணைவர் விசாக்கள், பணி விடுமுறைப் பயணிகள் (Working Holidaymakers), திறமைசார் புலம்பெயர்வு மற்றும் அகதிகள் / மானுடபிமானத் திட்டங்கள் ஆகியவை அடங்கும்.

லேபர் (Labor) கட்சி ஆட்சியின் கீழ், கோவிட்-19 பெருந்தொற்றைத் தொடர்ந்து, 2023-ஆம் ஆண்டில் நிகர வெளிநாட்டுப் புலம்பெயர்வு 5,56,000 என்ற வரலாற்றுச் உச்சத்தை எட்டியது.

ஆனால், இதில் கட்டுப்பாடுகளைத் தீவிரப்படுத்தத் தொடங்கியுள்ள லேபர் அரசு, 2027-2028 நிதியாண்டிற்குள் இந்த எண்ணிக்கையை 2,25,000 ஆகக் குறைக்க இலக்கு நிர்ணயித்துள்ளது.

நிகர வெளிநாட்டுப் புலம்பெயர்வு தொடர்பான தனது கணிப்புகளை அடைவதை உறுதி செய்ய, புலம்பெயர்வு விதிகளைத் தளர்த்துவது குறித்த திட்டத்தை வெளியிட அரசு ஆயத்தமாகி வருகிறது.

உள்துறை அமைச்சர் டோனி பார்க் (Tony Burke) கடந்த வாரம் தேசிய பத்திரிகையாளர் மன்றத்தில் இத்திட்டத்தை வெளியிட இருந்தார். ஆனால் சில திட்டங்களில் மேற்கொள்ளப்படும் குறைப்புகளால் ஏற்படும் அரசியல் விளைவுகள் குறித்த அமைச்சரவையின் தயக்கம் காரணமாக அது தற்காலிகமாக நிறுத்தி வைக்கப்பட்டது.

‘ஒன் நேஷன்’ கட்சியின் வலைத்தளத்தின்படி, “வீட்டுவசதி, ஊதியம் மற்றும் உள்கட்டமைப்பு மீதான அழுத்தத்தைக் குறைக்க விசாக்களை ஆண்டிற்கு 1,30,000 ஆகக் கட்டுப்படுத்துவது” அவர்களின் கொள்கையாகும்.

இந்த 1.3 லட்சம் என்ற வரம்பு நிகர வெளிநாட்டு புலம்பெயர்வை அடிப்படையாகக் கொண்டது என்பதை ‘ஒன் நேஷன்’ செய்தித் தொடர்பாளர் எஸ்பிஎஸ் வேர்ல்ட் உறுதிப்படுத்தியுள்ளார்.

இது தற்போதைய எண்ணிக்கையிலிருந்து மிகப்பெரிய அளவிலான குறைப்பாகும். இந்த நடவடிக்கை பலதரப்பட்ட விசா வகைகளைப் பாதிப்பதுடன், நாடு தழுவிய உற்பத்தியையும் முடக்கும் என்று அரசு வாதாடுகிறது.

ஆனால், பொருளாதாரத்தை வழிநடத்த அரசு புலம்பெயர்வோர் மீது அதிக அளவில் சார்ந்திருப்பதாக ‘வன் நேஷன்’ கட்சியின் தலைவர் பாலின் ஹேன்சன் (Pauline Hanson) குற்றம் சாட்டியுள்ளார்.

ஆஸ்திரேலிய அரசியலில் மக்கள் மத்தியில் வன் நேஷன் கட்சிக்கு தற்போது பெரும் செல்வாக்கு அதிகரித்துவருகின்றமை குறிப்பிடத்தக்கது.