ஊழலை அகற்ற 22 ஆவது திருத்தம் அவசியம் : இந்த விடயத்தில் பின்வாங்க மாட்டோம்

அரசியலமைப்பின் முன்மொழியப்பட்ட 22வது திருத்தம் எந்தச் சூழ்நிலையிலும் மாற்றியமைக்கப்படாது என்று ஜனாதிபதி அனுர குமார திசாநாயக்க உறுதிப்பட தெரிவித்துள்ளார்.

மேலும், உச்ச நீதிமன்றத்தின் தீர்ப்பு கிடைத்தவுடன் அரசாங்கம் இந்தத் திருத்தத்தை முன்னெடுத்துச் செல்லும் என்றும் அவர் கூறினார்.

புலத்சிங்களவவில் நடைபெற்ற பொதுநிகழ்வொன்றில் கலந்துகொண்டு கருத்து வெளியிடுகையிலேயே அவர் இவ்வாறு தெரிவித்துள்ளார்.

இதன்போதுமேலும் கருத்து வெளியிட்ட அவர், முன்மொழியப்பட்ட திருத்தத்தை எதிர்த்து உச்ச நீதிமன்றத்தில் தாக்கல் செய்யப்பட்ட மனுக்கள் மீதான தீர்ப்பு விரைவில் எதிர்பார்க்கப்படுவதாகவும் கூறினார்.

நீதிமன்றம் தனது தீர்ப்பை வழங்கியவுடன், இந்தத் திருத்தம் பாராளுமன்றத்தில் சமர்ப்பிக்கப்பட்டு விரைவில் நிறைவேற்றப்படும்.

முன்மொழியப்பட்ட சட்ட மற்றும் அரசியலமைப்பு சீர்திருத்தங்களுக்கு எதிர்ப்பு இருந்தபோதிலும், மக்களின் நலனுக்காக எடுக்கப்பட்ட முடிவுகளிலிருந்து தற்போதைய அரசாங்கம் பின்வாங்காது.

ஊழலுக்குப் பொறுப்பானவர்கள் மீது நடவடிக்கை எடுக்க வேண்டியதன் அவசியத்தையும் அவர் வலியுறுத்தினார். ஊழல் நிறைந்த அரச அமைப்பு என்று அவர் விவரித்ததை அகற்றுவதற்கு அத்தகைய நடவடிக்கைகள் அவசியம் என்றும் அவர் கூறினார்.