இங்கிலாந்தின் பணவீக்கம் சரிய வாய்ப்பு – பர்ன்ஹாமிற்கு காத்திருக்கும் சவால்

கடந்த ஜுன் மாதத்தில் இங்கிலாந்தின் பணவீக்கம் சரியும் என எதிர்பார்க்கப்படுகிறது.

இது புதிய பிரதமர் ஆண்டி பர்ன்ஹாமிற்கு (Andy Burnham) தற்காலிக ஊக்கத்தை அளிக்கிறது.

மே மாதத்தில் 2.8% ஆக இருந்த பணவீக்கம், ஜூன் மாதத்தில் 2.7% ஆகக் குறையும் என எதிர்பார்க்கப்படுகிறது.

பெட்ரோல் மற்றும் டீசல் விலைகளில் ஏற்பட்ட குறிப்பிடத்தக்க வீழ்ச்சியே இந்த சரிவுக்கு முக்கியக் காரணமாகும். ஜூன் மாதத்தில் ஒரு லிட்டர் டீசலின் விலை 16 பென்ஸுக்கு  மேல் சரிந்துள்ளது. இது 2000-ஆம் ஆண்டிற்குப் பிறகு ஏற்பட்ட மிகப்பெரிய மாதாந்திர சரிவாகும்.

அமெரிக்காவிற்கும் ஈரானுக்கும் இடையே ஏற்பட்ட இடைக்கால போர்நிறுத்த ஒப்பந்தம் குறித்த செய்திகளால் இந்த விலைவீழ்ச்சி ஏற்பட்டதும் குறிப்பிடத்தக்கது.

இது எண்ணெய் விலைகளை நெருக்கடிக்கு முந்தைய நிலைகளுக்குக் கீழே குறைத்ததுடன், வீட்டு எரிசக்தி பணவீக்கத்திலும் ஒரு தற்காலிக சரிவை ஏற்படுத்தியது.

எவ்வாறாயினும் ஜூன் மாதத்தில் இந்தத் தணிவு ஏற்பட்ட போதிலும், வரவிருக்கும் பாதை ‘சவாலானது’ என பொருளாதார வல்லுநர்கள் எச்சரித்துள்ளனர்.

ஏனெனில் ஜூலை முதல் அமலுக்கு வரும் புதிய ஆஃப்கெம் (Ofgem) எரிசக்தி விலை உச்சவரம்பு, ஒரு சராசரி வீட்டுக் கட்டணத்தை 13% அதிகரித்து ஆண்டுக்கு 1,862  பவுண்ட்ஸ் ஆக உயர்த்தியுள்ளது.

இதற்கிடையே வாழ்க்கைச் செலவு அழுத்தங்களுக்குப் பதிலளிக்கும் விதமாக, அக்டோபர் 1 முதல் மின்சாரக் கட்டணங்களுக்கு மதிப்புக்கூட்டு வரி (VAT) இல்லை என்று பிரதமர் ஆண்டி பர்ன்ஹாம் அறிவித்தார்.

இந்த நடவடிக்கையால் குடும்பங்களுக்கு ஆண்டுக்குச் சுமார் £45 சேமிக்கப்படும் என்றும், நுகர்வோர் விலைக் குறியீட்டுப் பணவீக்கம் (CPI inflation) சுமார் 0.1 சதவீதப் புள்ளிகள் குறையும் என்றும் எதிர்பார்க்கப்படுகிறது.