மும்பையில் நடிகர் டைகர் ஷ்ராப்பின் கார்மீது துப்பாக்கிச்சூடு: மூவர் கைது

பாலிவுட் நடிகர் டைகர் ஷ்ராப் Tiger Shroff பயணித்த காரை இலக்கு வைத்து மும்பையின் ஜுஹு பகுதியில் நடத்தப்பட்ட துப்பாக்கிச் சூட்டில், நடிகர் காயமடைவதிலிருந்து தப்பியுள்ளார். எனினும், அவரது சாரதியும் அருகிலிருந்த ஒருவரும் காயமடைந்துள்ளனர். இச்சம்பவம் தொடர்பாக லாரன்ஸ் பிஷ்னோய் கும்பலுடன் தொடர்புடையவர்கள் எனக் கூறப்படும் நபர்கள் மீது பொலிஸார் விசாரணை நடத்தி வருகின்றனர்.

மும்பை ஜுஹு பகுதியில் ஞாயிற்றுக்கிழமை இரவு சுமார் 7 மணியளவில், புஷ்பா நர்சி பார்க் பகுதியில் நடைபெற்ற பிறந்தநாள் நிகழ்விலிருந்து வெளியேறிய டைகர் ஷ்ராப் பயணித்த காரை நோக்கி மோட்டார் சைக்கிளில் வந்த மூவர் துப்பாக்கிச் சூடு நடத்தியதாகத் தெரிவிக்கப்படுகிறது.

இச்சம்பவத்தில் ஏழு முறை துப்பாக்கி பிரயோகம் இடம்பெற்றதாகவும், காரின் கண்ணாடி சேதமடைந்ததாகவும் பொலிஸார் தெரிவித்துள்ளனர்.

நடிகர் டைகர் ஷ்ராப் துப்பாக்கிச் சூட்டுக் காயங்களிலிருந்து தப்பியபோதிலும், கண்ணாடிச் சிதறல்களால் சிறிய காயங்களுக்கு உள்ளானார். அவரது சாரதி பிர்தாஸ் இடது கையில் துப்பாக்கிக் காயமடைந்தார். அருகிலிருந்த ரசிகர் ஒருவரும் மார்புப் பகுதியில் துப்பாக்கிக் காயமடைந்ததாகச் செய்திகள் தெரிவிக்கின்றன. இருவரும் மருத்துவமனைக்குக் கொண்டு செல்லப்பட்டனர்.

லாரன்ஸ் பிஷ்னோய் கும்பல் தொடர்பு?

சமூக ஊடகங்களில் பரப்பப்பட்ட குரல் பதிவொன்றில், அனில் பண்டிட் மற்றும் ஹர்மன் சந்து எனத் தங்களை அடையாளப்படுத்திக் கொண்ட இருவர் இத்தாக்குதலுக்குப் பொறுப்பேற்றதாகக் கூறப்படுகிறது.

அவர்கள் லாரன்ஸ் பிஷ்னோய் கும்பலுடன் தொடர்புடையவர்கள் என்றும் தெரிவிக்கப்படுகிறது. சல்மான் கானுடன் பணியாற்றுவதைத் தவிர்க்குமாறு விடுக்கப்பட்ட எச்சரிக்கையை டைகர் ஷ்ராப் புறக்கணித்ததாகவும், சல்மான் கானுடன் தொடர்பில் இருப்பவர்களுக்கு எதிராக நடவடிக்கை எடுக்கப்படும் என்றும் அந்தச் செய்தியில் மிரட்டல் விடுக்கப்பட்டதாகத் தகவல்கள் வெளியாகியுள்ளன.

எனினும், சமூக ஊடகங்களில் வெளியான இந்தக் கூற்றுகளின் நம்பகத்தன்மையைப் பொலிஸார் சரிபார்த்து வருகின்றனர்.

தாக்குதலுக்குப் பயன்படுத்தப்பட்டதாகச் சந்தேகிக்கப்படும் பல்சர் ரக மோட்டார் சைக்கிள், அந்தேரி மேற்கு ரயில் நிலையத்திற்கு அருகிலிருந்து மீட்கப்பட்டதாக மும்பை பொலிஸார் தெரிவித்துள்ளனர். அதன் உரிமையாளர்களிடம் விசாரணை நடத்தப்பட்டு வருவதாகவும் கூறப்படுகிறது.

சந்தேகநபர்களைக் கண்டறிய மும்பை பொலிஸாரும் குற்றப்பிரிவு அதிகாரிகளும் விசாரணையைத் தீவிரப்படுத்தியுள்ளனர். சம்பவ இடத்திலுள்ள கண்காணிப்பு கமரா பதிவுகளும் ஆய்வு செய்யப்பட்டு வருகின்றன.

இன்று (19) வெளியான டைம்ஸ் ஒப் இந்தியா செய்தியின் சமீபத்திய புதுப்பிப்பின்படி, இச்சம்பவத்துடன் தொடர்புடையதாகச் சந்தேகிக்கப்படும் மூவரை ராஜஸ்தான் பொலிஸார் தடுத்து வைத்துள்ளதாகத் தெரிவிக்கப்பட்டுள்ளது. இதுகுறித்து விரிவான செய்தியாளர் சந்திப்பு நடத்தப்படவுள்ளதாகவும் அந்தச் செய்தி குறிப்பிட்டுள்ளது.