குரோஷியாவை வீழ்த்தியது போர்ச்சுகல்

மாற்று வீரராக (Substitute) களம் புகுந்த கொன்சலோ ராமோஸ் (Goncalo Ramos) தலையால் முட்டி (Header) அடித்த அற்புதம் கோலின் உதவியோடு, 2026 FIFA உலகக்கோப்பை கால்பந்து தொடரின் கடைசி 16 தகுதிச் சுற்றுக்குள் (Last 16) போர்ச்சுகல் நுழைந்துள்ளது.

விறுவிறுப்பாக நடைபெற்ற இந்த ஆட்டத்தில் குரோஷியாவை 2-1 என்ற கோல் கணக்கில் போர்ச்சுகல் வீழ்த்தியது.

டொராண்டோவின் கடுமையான வெப்பத்துக்கு மத்தியில் வியாழக்கிழமை இரவு நடைபெற்ற இந்த ஆட்டத்தில், பெரும்பாலான கோல் அடிக்கும் வாய்ப்புகளைக் குரோஷியாவே உருவாக்கியது.

எனினும், கூடுதல் நேரத்தின் நான்காவது நிமிடத்தில் (Stoppage time) Rafael Leao கொடுத்த மிகச் சிறந்த பாஸை (Pass) ராமோஸ் கோலாக மாற்றி குரோஷியாவின் கனவைத் தகர்த்தார்.

ஆட்டத்தின் கடைசி நொடிகளில் குரோஷிய வீரர் ஜோஸ்கோ குவார்டியோல் (Josko Gvardiol) அடித்த கோல் ‘ஆஃப்சைடு’ Offside என அறிவிக்கப்பட்டதால், ஆட்டம் பெரும் பரபரப்புடன் முடிவடைந்தது.

இந்தத் தீர்ப்பால் குரோஷிய வீரர்கள் அதிர்ச்சியில் உறைந்தனர், போர்ச்சுகல் வீரர்கள் வெற்றிக்கொண்டாட்டத்தில் மூழ்கினர்.

போர்ச்சுகல் அணியின் இந்த வெற்றியில் நட்சத்திர வீரர் கிறிஸ்டியானோ ரொனால்டோ முக்கியப் பங்கு வகித்தார்.

ஆட்டத்தின் தொடக்கத்தில் குரோஷியாவின் இவான் பெரிசிச் (Ivan Perisic) அடித்த கோலுக்குப் பதிலடியாக, ரொனால்டோ பெனால்டி (Penalty) மூலம் ஒரு கோல் அடித்து ஆட்டத்தைச் சமன் செய்தார்.

உலகக்கோப்பையின் நாக்-அவுட் (Knockout phase) சுற்றில் ரொனால்டோ அடித்த முதல் கோல் இதுவாகும். இந்த வெற்றியின் மூலம், டல்லாஸ் நகரில் திங்கட்கிழமை நடைபெறவுள்ள அடுத்த சுற்றில் ஸ்பெயின் அணியை போர்ச்சுகல் எதிர்கொள்ளும் போது, ரொனால்டோவின் சர்வதேச கால்பந்து வாழ்க்கையின் மற்றொரு புதிய அத்தியாயம் தொடங்கும்.

அதிரடித் திருப்பங்கள்

முன்னதாக, ஆட்டத்தின் 53-ஆவது நிமிடத்தில் குரோஷியாவின் பெரிசிச், போர்ச்சுகல் கோல்கீப்பர் டியோகோ கோஸ்டாவை (Diogo Costa) ஏமாற்றி பந்தை வலைக்குள் செலுத்தி போர்ச்சுகல் அணிக்கு அதிர்ச்சியளித்தார்.

அடுத்த சில நிமிடங்களிலேயே ரொனால்டோ ஒரு கோல் அடித்தார், ஆனால் அது ஆஃப்சைடு என மறுக்கப்பட்டது.

அதன்பின், போர்ச்சுகல் வீரர் ரெனாடோ வைகாவை (Renato Veiga) குரோஷியாவின் நிகோலா விளாசிச் பெனால்டி பகுதிக்குள் பிடித்து இழுத்ததால், விஏஆர் (VAR) பரிசோதனைக்குப் பிறகு நடுவர் பெனால்டி வாய்ப்பை வழங்கினார்.

இந்த வாய்ப்பைப் பயன்படுத்திய ரொனால்டோ, பந்தை கோல் போஸ்ட்டின் நடுப்பகுதிக்கு நேராக அடித்து எளிதாகக் கோலாக்கினார்.

பரபரப்பான இந்த ஆட்டத்தில், மான்செஸ்டர் சிட்டி அணியின் ஃபார்வர்ட் வீரர் மேடியோ கோவாசிக்கின் (Mateo Kovacic) ஷாட்டை கோல்கீப்பர் கோஸ்டா தனது விரல் நுனிகளால் தடுத்து நிறுத்தினார்.

தொடர்ந்து குரோஷியா அழுத்தத்தைக் கொடுத்தது, பீட்டர் சுசிக் (Petar Sucic) அடித்த கோலும் ஆஃப்சைடு என அறிவிக்கப்பட்டது.

ஆட்டத்தின் 81-ஆவது நிமிடத்தில் ரொனால்டோவுக்குப் பதிலாக ரூபன் நெவஸ் (Ruben Neves) களம் இறக்கப்பட்டார். குரோஷியா தொடர்ந்து பல வாய்ப்புகளை உருவாக்கியது, மரியோ பாசாலிச் (Mario Pasalic) தலையால் முட்டி அடித்த பந்து நூலிழையில் கோல் போஸ்ட்டிற்கு வெளியே சென்றது.

ஆனால், ஆட்டத்தின் கடைசி தருணத்தில் ராமோஸ் அடித்த பந்து கோல் வலையைத் துளைக்க, போர்ச்சுகல் அணி அடுத்த சுற்றுக்குத் தகுதி பெற்றது.