தென்கொரியாவுக்கு இறுதி எச்சரிக்கை விடுத்தது வடகொரியா

தென் கொரிய படைகள் தமது பாதுகாப்புக்கு அச்சுறுத்தல் ஏற்படுத்தினால், உடனடியாகவும் உறுதியுடனும் நடவடிக்கை எடுக்குமாறு எல்லைப் பகுதியில் பணியாற்றும் படையினருக்கு வட கொரியா உத்தரவிட்டுள்ளது.

வட கொரிய அரச ஊடகங்கள் புதன்கிழமை வெளியிட்ட தகவலின்படி, இந்த உத்தரவு கொரிய தீபகற்பத்தின் இராணுவமயமாக்கப்பட்ட எல்லைப் பகுதியில் இரு நாடுகளுக்கும் இடையிலான பதற்றத்தை மேலும் அதிகரிக்கும் அபாயத்தை ஏற்படுத்தியுள்ளது.

தென் கொரியாவுடனான எல்லைப் பகுதியில் அமைக்கப்பட்டுள்ள பாதுகாப்பு அரண்களை வட கொரிய இராணுவத் தளபதி மார்ஷல் பாக் ஜோங் சுன் செவ்வாய்க்கிழமை நேரில் சென்று ஆய்வு செய்துள்ளார்.

வட கொரியத் தலைவர் கிம் ஜோங் உன்னின் சகோதரியான கிம் யோ ஜோங்கும் அவருடன் சென்றிருந்ததாக வட கொரியாவின் மத்திய செய்தி நிறுவனம் (KCNA) தெரிவித்துள்ளது.

இதன்போது, எல்லைப் பகுதியில் புதிய தாக்குதல் திறன் கொண்ட இராணுவப் பிரிவுகள் தங்களுக்கான நிலைகளில் நிலைநிறுத்தப்பட்டுள்ளதாக கிம் யோ ஜோங் குறிப்பிட்டுள்ளார்.

தென் கொரியாவின் எச்சரிக்கையைத் தொடர்ந்து பதற்றம்

வட கொரியா எல்லைப் பகுதியில் தனது இராணுவ நிலைப்பாட்டை மேலும் வலுப்படுத்தும் நடவடிக்கைகளில் ஈடுபட்டால், அதற்குப் பதிலாக உறுதியான நடவடிக்கை எடுக்கப்படும் எனத் தென் கொரியா முன்னதாக எச்சரித்திருந்தது.

வட கொரியாவின் புதிய அச்சுறுத்தல்களும் தென் கொரியாவின் பதிலடி எச்சரிக்கையும் இரு நாடுகளுக்கும் இடையே நேரடி மோதல் ஏற்படக்கூடிய அபாயத்தை அதிகரித்துள்ளன.

1953ஆம் ஆண்டு கொரியப் போர் போர் நிறுத்த உடன்படிக்கையுடன் முடிவடைந்ததைத் தொடர்ந்து, இரு நாடுகளுக்கும் இடையே இராணுவமயமாக்கப்பட்ட வலயமொன்று (DMZ) உருவாக்கப்பட்டது. இருப்பினும், இந்தப் பகுதியில் நீண்டகாலமாக நிலவி வரும் பதற்றம் அண்மைக் காலமாக மீண்டும் அதிகரித்துள்ளது.

குறிப்பாக, 2024ஆம் ஆண்டு ஏப்ரல் மாதம் முதல் வட கொரியா தனது எல்லைப் பாதுகாப்பை வலுப்படுத்தும் பணிகளைத் தீவிரப்படுத்தியுள்ளதாகத் தெரிவிக்கப்படுகிறது.