மும்பையை உலுக்கிய கொலை: விசாரணையை பொறுப்பேற்றது சிபிஐ

இந்தியாவின் பஞ்சாப் மாநிலத்தில் போதைப்பொருள் விற்பனைக்கு எதிராகச் செயற்பட்டு வந்த பர்விந்தர் சிங் ஜோட்டா கொலை செய்யப்பட்ட சம்பவம் தொடர்பான விசாரணையை, இந்திய மத்திய புலனாய்வுப் பிரிவான சிபிஐ (CBI) பொறுப்பேற்றுள்ளது.

மான்சா பகுதியில் இடம்பெற்ற இந்தக் கொலை தொடர்பான வழக்கை மீண்டும் பதிவு செய்துள்ள சிபிஐ, சம்பவத்தின் பின்னணி மற்றும் தடைசெய்யப்பட்ட போதைப்பொருட்கள், போதையை ஏற்படுத்தும் மருந்துகள் சட்டவிரோதமாக விற்பனை செய்யப்படுவது தொடர்பான விடயங்களையும் விசாரிக்கவுள்ளது.

இதற்காக, சிபிஐயின் மூத்த அதிகாரி ஒருவரின் தலைமையிலான குழு மான்சாவைச் சென்றடைந்துள்ளது. உள்ளூர் பொலிஸாரிடமிருந்து வழக்குடன் தொடர்புடைய ஆவணங்கள், தடயவியல் அறிக்கைகள் மற்றும் ஏனைய ஆதாரங்களைப் பெற்றுக்கொள்ளும் நடவடிக்கைகள் முன்னெடுக்கப்பட்டுள்ளன.

மேலும், தடயவியல் நிபுணர்கள், மருந்துக் கட்டுப்பாட்டு அதிகாரிகள் உள்ளிட்ட தொழில்நுட்ப நிபுணர்களும் விசாரணையில் இணைந்துகொள்ளவுள்ளனர். உயிரிழந்த ஜோட்டாவின் குடும்பத்தினரிடமும் வாக்குமூலங்கள் பெறப்படவுள்ளதாக அதிகாரிகள் தெரிவித்துள்ளனர்.

மருந்தக உரிமையாளர் உள்ளிட்டோரிடம் விசாரணை

45 வயதான பர்விந்தர் சிங் ஜோட்டா, கடந்த ஒக்டோபர் 13ஆம் திகதி மான்சா நகரிலுள்ள மருந்தகமொன்றில் வைத்து சுட்டுக் கொல்லப்பட்டார். அப்போது அவர் பேஸ்புக் நேரலை ஒளிபரப்பிலும் ஈடுபட்டிருந்ததாகத் தெரிவிக்கப்படுகிறது.

குறித்த மருந்தகத்தில் முதியவர் ஒருவருக்கு போதையை ஏற்படுத்தும் மருந்துகள் சட்டவிரோதமாக விற்பனை செய்யப்படுவதாகக் கூறி, அதன் உரிமையாளரிடம் ஜோட்டா கேள்வி எழுப்பியதைத் தொடர்ந்து வாக்குவாதம் ஏற்பட்டதாக ஆரம்பகட்டத் தகவல்கள் தெரிவிக்கின்றன.

இதன்போது துப்பாக்கிப் பிரயோகம் இடம்பெற்றதில் ஜோட்டா உயிரிழந்ததுடன், மேலும் நால்வர் காயமடைந்தனர்.

இந்தச் சம்பவம் தொடர்பில் பிரதான சந்தேகநபராகக் குறிப்பிடப்படும் மருந்தக உரிமையாளர் அஷ்வனி குமார், ராஜஸ்தான் மாநிலத்தின் சலாசர் பகுதியில் வைத்து கைது செய்யப்பட்டார்.

சந்தேகநபர் மற்றும் இந்தச் சம்பவத்துடன் தொடர்புடைய ஏனையோரிடம் விசாரணைகளை முன்னெடுப்பதற்காக, அவர்களைத் தமது காவலில் எடுத்து விசாரிக்க அனுமதி கோரி உரிய நீதிமன்றத்தை அணுகவும் சிபிஐ திட்டமிட்டுள்ளது.

சிபிஐ விசாரணைக்கு வழிவகுத்த குடும்பத்தின் கோரிக்கை

ஜோட்டாவின் கொலை தொடர்பில் சுயாதீனமான விசாரணை நடத்தப்பட வேண்டும் என அவரது குடும்பத்தினர், பல்வேறு அமைப்புகள் மற்றும் எதிர்க்கட்சிகள் கோரிக்கை விடுத்திருந்தன. இக்கோரிக்கைகளுக்கு மத்தியில், பஞ்சாப் முதலமைச்சர் பகவந்த் மான் இந்த வழக்கைச் சிபிஐயிடம் ஒப்படைக்கத் தீர்மானித்தார்.

இந்திய மத்திய உள்துறை அமைச்சர் அமித் ஷா, ஒக்டோபர் 20ஆம் திகதி ஜோட்டாவின் குடும்பத்தினரைச் சந்தித்திருந்தார். இதனையடுத்து, கொலை தொடர்பான விசாரணையை மத்திய புலனாய்வுப் பிரிவு பொறுப்பேற்றுள்ளது.

பஞ்சாப் மாநிலத்தில் போதைப்பொருள் கடத்தல் மற்றும் சட்டவிரோத விற்பனை தொடர்பாக அரசியல் விவாதங்கள் தீவிரமடைந்துள்ள நிலையில், ஜோட்டாவின் கொலைச் சம்பவம் மாநிலம் முழுவதும் பெரும் கவனத்தை ஈர்த்துள்ளது.

இந்த நிலையில், கொலையின் பின்னணியில் உள்ள தொடர்புகள், சட்டவிரோத மருந்து விற்பனை வலையமைப்பு மற்றும் சம்பவத்துடன் தொடர்புடைய ஏனைய தரப்பினர் குறித்து சிபிஐ விசாரணை நடத்தவுள்ளது.