இஸ்ரேல் பாதுகாப்பு அமைச்சருக்கு எதிராக இத்தாலியில் விசாரணை ஆரம்பம்

காசா சமூக ஆர்வலர்களை நடத்திய விதம் தொடர்பாக, இஸ்ரேலிய பாதுகாப்பு அமைச்சர் Israel Katz , சிரேஷ்ட ராணுவ, காவல்துறை மற்றும் சிறைத்துறை அதிகாரிகளுக்கு எதிராக இத்தாலியில் விசாரணை ஆரம்பமாகியுள்ளதாக வழக்கறிஞர்கள் வெள்ளிக்கிழமை தெரிவித்துள்ளனர்.

2025 மற்றும் 2026 ஆம் ஆண்டுகளில் காசாவை நோக்கிச் சென்ற சிறிய படகுக் குழுக்களை இஸ்ரேலியப் படைகள் இடைமறித்தபோது, சித்திரவதை, கடத்தல், தனிநபர் காயம், கொள்ளை மற்றும் சேதம் விளைவித்தல் போன்ற குற்றங்கள் புரிந்ததாக சந்தேகிக்கப்படும் வழக்கு இதுவென்று இத்தாலி அரசு வழக்கறிஞர் அலுவலகம் வெளியிட்டுள்ள அறிக்கையில் தெரிவிக்கப்பட்டுள்ளது.

செப்டம்பர் – அக்டோபர் 2025 மற்றும் ஏப்ரல் – மே 2026 ஆகிய காலப்பகுதிகளில் நடைபெற்ற இரண்டு ‘குளோபல் சமுத் புளோட்டிலா’ (Global Sumud Flotilla) பணிகளைத் தொடர்ந்து இஸ்ரேலிய அதிகாரிகளால் தடுத்து வைக்கப்பட்ட 50 இத்தாலிய குடிமக்கள் அளித்த முறைப்பாடுகளின் அடிப்படையில் புலனாய்வாளர்கள் இந்த விசாரணையைத் தொடங்கியுள்ளனர்.

இந்த விசாரணை குறித்துக் கருத்து தெரிவிக்க கோரியதற்கு காட்ஸ் உடனடியாகப் பதிலளிக்கவில்லை.

முதல் பணியின் போது தடுத்து வைக்கப்பட்ட சமூக ஆர்வலர்கள் தங்களுக்கு நேர்ந்த தாக்குதல்கள், காயங்கள், கொலை மிரட்டல்கள், அவமதிப்புகள் மற்றும் பயங்கரவாதக் குற்றச்சாட்டுகள் குறித்துப் புகாரளித்துள்ளதாக அரசு வழக்கறிஞர்கள் தெரிவித்தனர்.

இரண்டாவது பணியில் ஈடுபட்ட ஆர்வலர்கள் இருட்டில் தாக்குதலுக்கு உள்ளானதாகவும், டேசர் (tasers) மின்சாரக் கருவிகள் மற்றும் ரப்பர் தோட்டாக்கள் பயன்படுத்தப்பட்டதாகவும் தெரிவிக்கப்பட்டு, இன்னும் கடுமையான சித்திரவதைகளை எதிர்கொண்டதாக அந்த அறிக்கையில் குறிப்பிடப்பட்டுள்ளது.

இந்த நடவடிக்கைகளில் ஈடுபட்ட ராணுவ மற்றும் காவல்துறை கட்டளைச் சங்கிலியில் உள்ள பல்வேறு நபர்களைப் புலனாய்வாளர்கள் அடையாளம் கண்டுள்ளதாக அரசு வழக்கறிஞர்கள் தெரிவித்தனர்.