யாழில் 70 மில்லியன் ரூபாய்க்கும் அதிக மதிப்புடைய வீடுகள் முடக்கம்

இலங்கை காவல்துறையின் சட்டவிரோத சொத்துக்கள் விசாரணைப் பிரிவு, போதைப்பொருள் கடத்தல் மூலம் ஈட்டப்பட்டதாக சந்தேகிக்கப்படும் சுமார் 85 மில்லியன் ரூபாய் மதிப்பிலான பணம் மற்றும் சொத்துக்களை முடக்குவதற்கான உத்தரவுகளைப் பிறப்பித்துள்ளது.

இதில் யாழ்ப்பாணத்தில் 70 மில்லியன் ரூபாய்க்கும் அதிக மதிப்புள்ள இருமாடி வீடு ஒன்றும், 15 மில்லியன் ரூபாய் ரொக்கப் பணமும் அடங்கும் எனவும் பொலிஸார் குறிப்பிட்டனர்.

2023 ஆகஸ்ட் 31 அன்று, யாழ்ப்பாணத்தில் விசேட அதிரடிப்படை (STF) அதிகாரிகள் நடத்திய திடீர் சோதனையில் ஐந்து சந்தேக நபர்கள் கைது செய்யப்பட்டனர்.

அவர்களிடம் மேற்கொள்ளப்பட்ட விசாரணைகளின்போது சந்தேக நபர்களில் ஒருவரான மாதகலைச் சேர்ந்த 32 வயது நபர், போதைப்பொருள் கடத்தல் மூலம் கிடைத்த பணத்தைக் கொண்டு இந்த இருமாடி வீட்டை நிர்மாணித்திருக்கலாம் என்பது தெரியவந்துள்ளது.

அத்துடன் அப்போது சந்தேகநபரிடம் இருந்து  15 மில்லியன் ரூபாய் ரொக்கப் பணம் பறிமுதல் செய்யப்பட்டது.  குறித்த பணம் தற்போது யாழ்ப்பாண நீதிமன்றத்தின் பொறுப்பில் உள்ளதாக பொலிஸார் தெரிவித்தனர்.

இதற்கமைய, பணமோசடி தடுப்புச் சட்டத்தின் கீழ், குறித்த வீடு மற்றும் ரொக்கப் பணத்தை முடக்குவதற்கான உத்தரவுகளை சட்டவிரோத சொத்துக்கள் விசாரணைப் பிரிவு பிறப்பித்துள்ளது. இந்த உத்தரவு அக்டோபர் 15, 2026 முதல் 14 நாட்களுக்கு நடைமுறையில் இருக்கும்.

இது தொடர்பான மேலதிக விசாரணைகள் தொடர்ந்து நடைபெற்று வருகின்றன.