தணிந்த பதற்றம்: தங்கம் விலை உயர்வு; கச்சா எண்ணெய் விலை சரிவு

அமெரிக்க ஜனாதிபதிடொனால்ட் டிரம்ப் ஈரானுடன் விரைவான ஒப்பந்தத்தை எட்டும் நம்பிக்கையில் புதிய தாக்குதல்களை நிறுத்தி வைத்ததைத் தொடர்ந்து, கச்சா எண்ணெய் விலைகள் சரிந்தன. இதனால் பணவீக்கம் மற்றும் வட்டி விகித உயர்வு குறித்த கவலைகள் சற்று தணிந்து, திங்கள்கிழமை தங்கம் விலை உயர்வைக் கண்டது.

சர்வதேச சந்தையில் GMT 0210 மணி நிலவரப்படி, ஸ்பாட் தங்கம் (Spot gold) 0.4% உயர்ந்து அவுன்ஸ் ஒன்றுக்கு $4,055.76 ஆக விற்பனையானது. அமெரிக்க தங்க பியூச்சர்ஸ் (U.S. gold futures) 0.9% உயர்ந்து $4,054.00 ஆக இருந்தது.

ஜப்பானிய யென் (Yen) நாணயத்திற்கு ஆதரவாக நிதி அதிகாரிகள் அந்நிய செலாவணி சந்தையில் தலையிட்டதைத் தொடர்ந்து, அமெரிக்க டாலரின் மதிப்பு சரிவைக் கண்டது. இது டாலர் மதிப்பில் தங்கம் வாங்கும் பிற நாட்டு முதலீட்டாளர்களுக்குச் சாதகமாக அமைந்தது.

KCM ட்ரேட் நிறுவனத்தின் தலைமை சந்தைப் பகுப்பாய்வாளர் டிம் வாட்டரர் (Tim Waterer) கூறுகையில், “தங்கம் இந்த வாரத்தை ஒரு உற்சாகமான தொடக்கத்துடன் ஆரம்பித்துள்ளது.

இருப்பினும், எண்ணெய் சந்தை மற்றும் மத்திய கிழக்கு பிராந்தியத்தில் நிலவும் நிச்சயமற்ற தன்மையால், விலையேற்றம் குறிப்பிட்ட எல்லைக்குள்ளேயே கட்டுப்படுத்தப்பட்டுள்ளது” என்று தெரிவித்தார்.

ஈரானுடனான பேச்சுவார்த்தை திங்கள்கிழமை நடைபெறும் என்று கூறிய டிரம்ப், ஒப்பந்தத்தை எட்டுவதற்கான கெடு எதையும் விதிக்க மறுத்துவிட்டார். இதனிடையே, கச்சா எண்ணெய் விலை 5%-க்கும் அதிகமாகச் சரிந்தது.