ரொனால்டோவின் முடிவால் அதிர்ச்சியில் பயிற்சியாளர்: நடந்தது என்ன?

போர்த்துக்கல் கால்பந்தாட்ட அணியின் நட்சத்திர வீரர் கிறிஸ்டியானோ ரொனால்டோ, சர்வதேச கால்பந்தாட்டப் போட்டிகளிலிருந்து ஓய்வு பெறுவதாக அறிவித்தது குறித்து தனக்கு முன்கூட்டியே எதுவும் தெரியாது என அந்த அணியின் பயிற்சியாளர் ஜோர்ஜ் ஜீசஸ் Jorge Jesus தெரிவித்துள்ளார்.

41 வயதான ரொனால்டோ, நேற்று வியாழக்கிழமை தனது இன்ஸ்டாகிராம் காணொளி மூலம் சர்வதேச கால்பந்தாட்டத்திலிருந்து ஓய்வு பெறுவதாக அறிவித்தார்.

இந்த அறிவிப்பு வெளியாகும்போது, இம்மாதம் நடைபெறவுள்ள நேஷன்ஸ் லீக் போட்டிகளுக்கான போர்த்துக்கல் அணியின் வீரர்கள் பட்டியலை பயிற்சியாளர் அறிவிக்கத் தயாராகியிருந்தார்.

இது தொடர்பாக வெள்ளிக்கிழமை நடைபெற்ற ஊடகவியலாளர் சந்திப்பில் கருத்துத் தெரிவித்த ஜோர்ஜ் ஜீசஸ், ரொனால்டோ தனது முடிவு குறித்து முன்கூட்டியே தமக்குத் தெரிவிக்கவில்லை எனக் குறிப்பிட்டார்.

“அனைவரும் அறிந்துகொண்ட அதே நேரத்தில்தான் நானும் இதனை அறிந்துகொண்டேன். அதுவரை எனக்கு எதுவும் தெரியாது. அவர் விளையாடிக் கொண்டிருந்தார், கோல்களையும் அடித்துக் கொண்டிருந்தார். எனது அணிப் பட்டியலில் இடம்பெற்றிருந்த வீரர்களில் அவரும் ஒருவர்” என அவர் தெரிவித்தார்.

சர்வதேசப் போட்டிகளில் பங்கேற்பதற்கு விதிக்கப்பட்டிருந்த 30 நாட்கள் இடைநீக்கக் காலம் நிறைவடைந்த நிலையில், ரொனால்டோ மீண்டும் அணிக்குத் திரும்பத் தயாராகியிருந்தார். இந்த இடைநீக்கக் காலப்பகுதியில் போர்த்துக்கல் அணி எந்தவொரு சர்வதேசப் போட்டியிலும் விளையாடவில்லை.

இதற்கு முன்னர், கடந்த செப்டெம்பர் மாதம் டென்மார்க்குக்கு எதிரான நேஷன்ஸ் லீக் போட்டியில் தன்னை ஆரம்ப வீரராகக் களமிறக்கப் போவதில்லை எனத் தெரிவிக்கப்பட்டதைத் தொடர்ந்து, ரொனால்டோ போர்த்துக்கல் அணியின் பயிற்சி முகாமிலிருந்து வெளியேறியிருந்தார்.

இதனைத் தொடர்ந்து, பயிற்சியாளர் ஜோர்ஜ் ஜீசஸ் தனது வாக்குறுதியை மீறிவிட்டதாக ரொனால்டோ குற்றஞ்சாட்டியிருந்தார். எனினும், முன்கூட்டியே அணியிலிருந்து வெளியேறியதற்காகத் தண்டனை பெறத் தகுதியானவர் என்பதை ஏற்றுக்கொண்ட அவர், அப்போது சர்வதேசப் போட்டிகளிலிருந்து ஓய்வு பெறப்போவதில்லை என்றும் தெரிவித்திருந்தார்.

இந்நிலையில், வெள்ளிக்கிழமை நடைபெற்ற ஊடகவியலாளர் சந்திப்பில் இந்த முரண்பாடு குறித்து ஊடகவியலாளர்கள் தொடர்ச்சியாகக் கேள்வி எழுப்பியதால் பயிற்சியாளர் ஜோர்ஜ் ஜீசஸ் அதிருப்தியடைந்தார்.

“எனது அனைத்து முடிவுகளும் அணியின் நலனைக் கருத்தில் கொண்டே எடுக்கப்பட்டன. ஒரு பயிற்சியாளராக அணிக்கு எது சிறந்ததோ அதனை எப்போதும் பாதுகாத்து வந்துள்ளேன். எனது முடிவுகள் குறித்து நான் மனநிறைவுடன் இருக்கிறேன்” என அவர் குறிப்பிட்டார்.

2003ஆம் ஆண்டு சர்வதேச கால்பந்தாட்டத்தில் அறிமுகமான ரொனால்டோ, போர்த்துக்கல் அணிக்காக 234 போட்டிகளில் விளையாடி 146 கோல்களைப் பெற்றுள்ளார். சர்வதேச கால்பந்தாட்டத்தில் அதிக போட்டிகளில் விளையாடிய மற்றும் அதிக கோல்கள் அடித்த வீரர் என்ற இரு உலக சாதனைகளையும் அவர் தன்வசம் கொண்டுள்ளார்.

மேலும், 2016ஆம் ஆண்டு ஐரோப்பியக் கிண்ணத்தை போர்த்துக்கல் அணி வெற்றிகொள்வதற்கும் அவர் முக்கிய பங்களிப்பு வழங்கியிருந்தார்.

இதற்கிடையில், ரொனால்டோவின் ஓய்வு அறிவிப்புக்குப் பின்னர் அவருடன் இதுவரை தொடர்புகொள்ளவில்லை எனப் பயிற்சியாளர் ஜோர்ஜ் ஜீசஸ் தெரிவித்துள்ளார்.

எனினும், போர்த்துக்கல் கால்பந்தாட்ட சம்மேளனத்தின் தலைவர் பெட்ரோ புரோயென்சா, ரொனால்டோவின் சேவையைப் பாராட்டி கௌரவிப்பதாக உறுதியளித்துள்ளார்.