35 மில்லியன் யூரோ ஒப்பந்தம்: அட்லெடிகோ மாட்ரிட்டில் இணையும் தென் கொரிய நட்சத்திரம்
தென் கொரிய கால்பந்து அணியின் மத்தியகள வீரரான (Midfielder) லீ காங்-இன், பாரிஸ் செயிண்ட்-ஜெர்மைன் (PSG) அணியிலிருந்து ஸ்பெயினின் அட்லெடிகோ மாட்ரிட் (Atletico Madrid) அணியில் இணைய சம்மதம் தெரிவித்துள்ளார்.
லீ காங்-இன் ஜூன் , 2031 வரை ஒப்பந்தத்தில் கையெழுத்திடுவார் என்று அட்லெடிகோ அணி சனிக்கிழமை தெரிவித்துள்ளது.
இதற்கான இடமாற்றக் கட்டணம் (Transfer fee) அதிகாரப்பூர்வமாக அறிவிக்கப்படவில்லை என்றாலும், இது 35 முதல் 40 மில்லியன் யூரோக்களுக்கு இடைப்பட்டதாக ($39.8m – $45.5m) இருக்கும் எனக் கூறப்படுகிறது.
25 வயதான லீ, உலகக் கோப்பை தொடரின் மூன்று லீக் போட்டிகளிலும் விளையாடினார். அத்தொடரில் தென் கொரிய அணி இரண்டு போட்டிகளில் தோல்வியடைந்து அடுத்த சுற்றுக்கு முன்னேறத் தவறியது.
இன்சியானில் (Incheon) பிறந்த லீ, வலென்சியா (Valencia) கால்பந்து பயிற்சி மையத்தில் சேர்வதற்காகத் தனது 10வது வயதில் ஸ்பெயினுக்குக் குடிபெயர்ந்தார். பின்னர் அந்த அணிக்காக 62 போட்டிகளில் விளையாடினார்.
மயோர்கா (Mallorca) அணியில் சிறிது காலம் விளையாடிய பிறகு, 2023-இல் PSG அணியில் இணைந்த அவர், 124 போட்டிகளில் பங்கேற்று 16 கோல்களை அடித்தார்.
கடந்த சீசனில் லா லிகாவில் (La Liga) நான்காம் இடத்தைப் பிடித்த மற்றும் கோபா டெல் ரே (Copa del Rey) இறுதிப் போட்டி வரை முன்னேறிய அட்லெடிகோ அணிக்காக அவர் இனி விளையாடுவார்.
அட்லெடிகோ அணியின் அதிக கோல்களை அடித்த வீரரான அன்டோயின் கிரீஸ்மேன் (Antoine Griezmann) எம்.எல்.எஸ் (MLS) தொடருக்குச் சென்றுள்ளதால், அவர் விட்டுச் சென்ற இடத்தை நிரப்ப லீயின் வருகை அணிக்கு உதவும்.
