பங்காளிகளாக செயல்பட இந்தியா, சீனா இணக்கம்

டெல்லியில் நடைபெற்ற 18-வது பிரிக்ஸ் உச்சிமாநாட்டின் இடையே, சீன ஜனாதிபதி ஷி ஜின்பிங்கும் இந்தியப் பிரதமர் நரேந்திர மோடியும் சந்தித்தபோது, “சீனாவும் இந்தியாவும் பங்காளிகளாக இருக்க வேண்டும்” என்ற மிக முக்கியமான கூட்டுப் புரிதலை எட்டியுள்ளதாகச் சீன வெளியுறவுத் துறை அமைச்சர் வாங் யி தெரிவித்தார்.

பிரிக்ஸ் உச்சிமாநாட்டில் பங்கேற்பதற்காகச் சீன ஜனாதிபதி மேற்கண்ட இருநாட்கள் புதுடெல்லிக்கு வருகை தந்திருந்தார்.

இப் பயணத்தையும், பிரதமர் மோடியுடனான சந்திப்பையும் சுருக்கமாக விவரித்த அமைச்சர் வாங் யி, இரு நாட்டுத் தலைவர்களும் சீனா-இந்தியா உறவுகள் தொடர்பான மூலோபாய, நீண்டகால மற்றும் வழிகாட்டும் முக்கிய விஷயங்கள் குறித்துத் திறந்த மனதுடனும் ஆழமாகவும் கருத்துக்களைப் பரிமாறிக் கொண்டதாகக் கூறினார்.

சீனாவும் இந்தியாவும் ஒன்றுக்கொன்று பங்காளிகளாக விளங்க வேண்டும் என்பதே இவ்விரு தலைவர்களும் எட்டிய மிக முக்கியமான கூட்டுப் புரிதலாகும் என்று சீன அதிகாரப்பூர்வ ஊடகங்களிடம் வாங் யி தெரிவித்தார்.

சீனக் கம்யூனிஸ்ட் கட்சியின் மத்தியக் குழுவின் அரசியல் பணியக உறுப்பினருமான வாங் யி மேலும் கூறுகையில், “சீனாவும் இந்தியாவும் ஒன்றின் பலத்தை மற்றொன்று பயன்படுத்தி, பரஸ்பரம் ஆதரவளித்து, ஒருவர் மற்றவரின் வெற்றிக்கு உதவி செய்து, கூட்டு வளர்ச்சியை நோக்கிப் பயணிக்க முடியும் என்று ஜனாதிபதி ஷி ஜின்பிங் குறிப்பிட்டுள்ளார்” என்றார்.

எல்லைப் பகுதிகளில் அமைதியையும் அமைதியான சூழலையும் கூட்டாகப் பராமரிக்க இரு நாட்டுத் தலைவர்களும் ஒப்புக்கொண்டுள்ளனர்.

அதேவேளையில், பிரிக்ஸ் அமைப்பின் சுழற்சிமுறைத் தலைமையை ஏற்கும் போது இரு நாடுகளும் பரஸ்பரம் ஆதரவளிக்கும் என்றும் வாங் யி தெரிவித்தார்.

பிரதமர் மோடி – ஜனாதிபதி ஷி ஜின்பிங் இடையிலான இந்தச் சந்திப்பு சர்வதேச அளவில் பெரும் கவனத்தைப் பெற்றுள்ளது.