2 தடவைகள் உலகக்கிண்ணம் வென்ற உருகுவே அணிக்கு இம்முறை நெருக்கடி

உலகக் கோப்பை கால்பந்து தொடரில் முதன்முறையாகக் களம் கண்டுள்ள கேப் வெர்டே (Cape Verde) அணி, உருகுவே அணிக்கு எதிரான போட்டியை 2-2 என்ற கணக்கில் சமநிலையி முடித்தது.

ஸ்பெயின் அணிக்கு எதிரான தங்களின் தொடக்க ஆட்டத்தை சமநிலையி செய்து அதிர்ச்சியளித்த கேப் வெர்டே,  அதேபோன்று ஒரு சிறப்பான ஆட்டத்தை மீண்டும் வெளிப்படுத்தியுள்ளது.

மியாமி நகரில் நடைபெற்ற இப்போட்டியின் 21-வது நிமிடத்தில், கேப் வெர்டே அணியின் கெவின் பினா (Kevin Pina) ப்ரீ கிக் மூலம் முதல் கோலை அடித்து, அணிக்கு முன்னிலையைப் பெற்றுத் தந்தார்.

எனினும், முதல் பாதி முடிவடைவதற்கு சற்று முன்னதாக உருகுவே அணியின் மாக்ஸி அராவ்ஜோ (Maxi Araujo) மற்றும் அகஸ்டின் கனோபியோ (Agustin Canobbio) ஆகியோர் அடுத்தடுத்து கோல் அடித்து அணியை முன்னிலைக்குக் கொண்டு சென்றனர்.

ஆனால், ஆட்டத்தின் 61-வது நிமிடத்தில் உருகுவே அணியின் 40 வயது மூத்த கோல்கீப்பர் பெர்னாண்டோ முஸ்லெரா (Fernando Muslera) செய்த தவறால், கேப் வெர்டே அணியின் மாற்று ஆட்டக்காரர் ஹீலியோ வரேலா (Helio Varela) எளிதாக இரண்டாவது கோலை அடித்தார்.

‘எச்’ பிரிவில் (Group H) தனது இரண்டாவது புள்ளியைப் பெற்றதன் மூலம், கேப் வெர்டே அணி அடுத்த சுற்றுக்கு (knockout phase) முன்னேறும் வாய்ப்பை பிரகாசப்படுத்திக் கொண்டுள்ளது.

இந்த ஆப்பிரிக்கத் தீவு நாடு, எதிர்வரும் சனிக்கிழமை நடைபெறும் தங்களின் கடைசி லீக் போட்டியில் சவுதி அரேபியாவை எதிர்கொள்கிறது.

இப்போட்டியில் வெற்றி பெற்றால் கேப் வெர்டே அணி அடுத்த சுற்று வாய்ப்பை உறுதி செய்யும்.

அதே நேரத்தில், இரண்டு முறை உலக சாம்பியனான உருகுவே அணி, தங்களை விடக் குறைந்த தரவரிசையில் உள்ள சவுதி அரேபியாவுடன் (1-1) டிரா செய்ததைத் தொடர்ந்து, தற்போதும் புள்ளியைப் பகிர்ந்து கொண்டதால் அடுத்த சுற்றுக்கு முன்னேறும் வாய்ப்பு பெரும் ஆபத்தில் உள்ளது.

தொடர்ந்து இரண்டாவது முறையாக உலகக் கோப்பையின் லீக் சுற்றோடு வெளியேறுவதைத் தவிர்க்க வேண்டுமானால், தென் அமெரிக்க நாடான உருகுவே அடுத்த வார இறுதியில் நடைபெறும் போட்டியில் ஐரோப்பிய சாம்பியனான ஸ்பெயினை வீழ்த்த வேண்டிய கட்டாயத்தில் உள்ளது.