வெனிசுலா எண்ணெய் வளங்களை மீட்கும் ட்ரம்ப் நிர்வாகம்; அமெரிக்க நிறுவனங்களுக்குப் பெரும் வாய்ப்பு

வெனிசுலாவின் ஜனாதிபதி நிக்கோலஸ் மதுரோ அமெரிக்கப் படைகளால் கைது செய்யப்பட்டதைத் தொடர்ந்து, அந்நாட்டின் பரந்து விரிந்த எண்ணெய் வளங்களைக் கையாளுவதில் அமெரிக்க நிறுவனங்களுக்குப் புதிய வாய்ப்புகள் கிடைத்துள்ளன.

கடந்த 2007-ஆம் ஆண்டு சாவேஸ் (Chavez) ஆட்சிக்காலத்தில் தேசியமயமாக்கப்பட்ட தமது எண்ணெய் திட்டங்களுக்காக, பில்லியன் கணக்கான டாலர்களை இழப்பீடாகப் பெறுவதற்கு எக்ஸான் மோபில் (Exxon Mobil) மற்றும் கொனோகோபிலிப்ஸ் (ConocoPhillips) ஆகிய நிறுவனங்கள் தற்போது தீவிரமாக உள்ளன.

அதேவேளை, வெனிசுலாவில் இருந்து நாளொன்றுக்கு சுமார் 1.5 லட்சம் பீப்பாய்கள் எண்ணெயை அமெரிக்காவிற்கு ஏற்றுமதி செய்யும் செவ்ரான் (Chevron) நிறுவனம், தனது இருப்பைத் தக்கவைக்க ட்ரம்ப் நிர்வாகத்துடன் இணைந்து செயற்பட்டு வருகிறது.

இந்த அரசியல் மாற்றங்களால் முதலீட்டாளர்கள் உற்சாகமடைந்துள்ள நிலையில், S&P 500 எனர்ஜி குறியீடு 2025 மார்ச் மாதத்திற்குப் பிறகு மிக உயர்ந்த நிலையை எட்டியுள்ளது.

குறிப்பாக, செவ்ரான் பங்குகள் 5.1 சதவீதமும், எக்ஸான் மோபில் பங்குகள் 2.2 சதவீதமும் உயர்ந்துள்ளன.

வெனிசுலா மீதான அமெரிக்காவின் பொருளாதாரத் தடை இன்னும் முழுமையாக நீக்கப்படாத போதிலும், அந்நாட்டின் எண்ணெய் உட்கட்டமைப்பைச் சீரமைக்க அமெரிக்க நிறுவனங்கள் பில்லியன் கணக்கில் முதலீடு செய்யும் என எதிர்பார்க்கப்படுகிறது.