அமெரிக்கத் தேர்தலில் சீனத் தலையீடு? ஆவணங்களை பகிரங்கப்படுத்திய டிரம்ப்

அமெரிக்கத் தேர்தல்களில் சீனா தலையிட்டதைக் காட்டும் ஆவணங்கள் என்று கூறி, சில ஆவணங்களை ஜனாதிபதி டொனால்ட் டிரம்ப் வியாழக்கிழமை அன்று பகிரங்கப்படுத்தினார்.

தான் தோல்வியடைந்த 2020 ஆம் ஆண்டு ஜனாதிபதிதேர்தலில் சீனா செல்வாக்கு செலுத்தியதற்கான எந்தவொரு ஆதாரமும் இல்லை என்ற அமெரிக்க உளவுத்துறையின் மதிப்பீட்டையும் மீறி, தேர்தல் பாதுகாப்பு குறித்த தனது நீண்டகால குற்றச்சாட்டுகளை அவர் மீண்டும் புதுப்பித்துள்ளார்.

முக்கிய நேரத்தில் (prime-time) ஒளிபரப்பப்பட்ட இந்த 25 நிமிட உரை, வரவிருக்கும் நவம்பர் மாத இடைக்காலத் தேர்தலுக்கு முன்னதாக, தேர்தல் பாதுகாப்பை ஒரு முக்கிய அரசியல் பிரச்சினையாக மாற்றுவதற்கான டிரம்பின் முயற்சியை அடிக்கோடிட்டுக் காட்டுகிறது.

இந்த இடைக்காலத் தேர்தலில் அவரது குடியரசுக் கட்சியினர் காங்கிரஸில் (நாடாளுமன்றம்) தங்களுக்கு இருக்கும் மிகக் குறைந்த பெரும்பான்மையைத் தக்கவைக்கப் போராட வேண்டியிருக்கும்.

அமெரிக்கத் தேர்தல்களில் வாக்காளர் மோசடி என்பது மிகவும் அரிதான ஒன்று என்ற நீண்டகாலக் கண்டுபிடிப்புகள் இருந்தபோதிலும், புதிய வாக்காளர் அடையாள அட்டை மற்றும் குடியுரிமைத் தேவைகளை கட்டாயமாக்கும் சட்டத்தை காங்கிரஸில் உள்ள குடியரசுக் கட்சியினர் நிறைவேற்ற வேண்டும் என்று டிரம்ப் தனது உரையில் மீண்டும் வலியுறுத்தினார்.

இந்த மசோதா ஜனநாயகக் கட்சியினரின் கடும் எதிர்ப்பு காரணமாக செனட் சபையில் முடங்கியுள்ளது.

பகிரங்கப்படுத்தப்பட்ட இந்த ஆவணங்கள் “நமது தேர்தல் உள்கட்டமைப்பில் உள்ள அதிர்ச்சியூட்டும் பலவீனங்களை” வெளிப்படுத்தும் என்று டிரம்ப் கூறினார். ஆனால், அதில் உள்ள பல ஆவணங்கள் அதற்கு நேர்மாறானதைக் காட்டுவதாகவும் அல்லது அமெரிக்க தேர்தல் உள்கட்டமைப்புடன் எந்தத் தொடர்பும் இல்லாததாகவும் காணப்பட்டன.

டிரம்பிற்கும் குடியரசுக் கட்சியினருக்கும் அரசியல் ரீதியாக சவாலான ஒரு தருணத்தில் இந்த உரை வந்துள்ளது.

மக்களிடையே பெரும் வரவேற்பைப் பெறாத ஈரான் போர் மற்றும் அதிக எரிசக்தி விலைகள் காரணமாக டிரம்பின் மக்கள் ஆதரவு மதிப்பீடு (approval rating) சரிவடைந்துள்ளது.

உரையின் தொடக்கத்தில் போரைப் பற்றி சுருக்கமாகக் குறிப்பிட்ட டிரம்ப், அமெரிக்கா “பெரிய வெற்றியைப் பெற்று வருகிறது” என்று கூறினார்.

மேலும் தேர்தல் பாதுகாப்பு குறித்துப் பேசுவதற்கு முன்பு, வரி குறைப்புகள் மற்றும் குடியேற்றக் கட்டுப்பாடு உள்ளிட்ட தனது தொடர்ச்சியான உள்நாட்டுச் சாதனைகளைப் பட்டியலிட்டார்.

பெயர்கள், முகவரிகள் மற்றும் பிற தரவுகள் உள்ளிட்ட 220 மில்லியன் அமெரிக்க வாக்காளர்களின் கோப்புகளை சீனா சட்டவிரோதமாகப் பெற்றுள்ளதை உணர்த்தும் முக்கியமான விபரங்களை தான் பகிரங்கப்படுத்துவதாக ஜனாதிபதி கூறினார்.

சீனாவின் இந்த நடவடிக்கைகளின் அளவு குறித்த தகவல்களை அமெரிக்க உளவுத்துறை சமூகத்தின் உறுப்பினர்கள் வேண்டுமென்றே மறைத்துவிட்டதாகவும் அவர் குற்றம் சாட்டினார்.

டிரம்பின் உரைக்கு முன்னதாக, சீனா தொடர்பான இந்தத் தகவல்களை வெளியிடுவது தவறான புரிதலை ஏற்படுத்தக்கூடும் என்று வெள்ளை மாளிகை அதிகாரிகள் சிலர் கவலை தெரிவித்ததாக ராய்ட்டர்ஸ் (Reuters) செய்தி நிறுவனம் தெரிவித்துள்ளது.

சீனா குறித்த டிரம்பின் இத்தகைய கடுமையான வார்த்தைகள், கடந்த ஆண்டு ஏற்பட்ட கடுமையான வர்த்தகப் போருக்குப் பிறகு தற்போது சீராகியுள்ள இருநாட்டு உறவை மீண்டும் பாதிக்கக்கூடிய அபாயத்தைக் கொண்டுள்ளது.

டிரம்பின் இந்த உரை குறித்து சீனாவின் வெளியுறவு அமைச்சகம் உடனடியாக எந்தப் பதிலும் அளிக்கவில்லை.