பிரான்ஸை வீழ்த்தி அபார வெற்றி:ஸ்பெயின் இறுதிப்போட்டிக்கு தகுதி

டல்லாஸ் மைதானத்தில் நடைபெற்ற FIFA உலகக் கோப்பை 2026 அரையிறுதிப் போட்டியில், ஸ்பெயின் அணி ஒருபுறம் பிரான்ஸின் தாக்குதல்களை முறியடித்தும், மறுபுறம் அவர்களுக்குத் தகுந்த பதிலடி கொடுத்தும் அபார வெற்றி பெற்றது.

La Roja என்று அழைக்கப்படும் ஸ்பெயின் அணி, தனது தற்காப்பு ஆட்டத்தால் ‘லெஸ் ப்ளூஸ்’ (Les Bleus) பிரான்ஸ் அணியின் வாய்ப்புகளைக் கட்டுப்படுத்தியதுடன், மைக்கேல் ஓயார்சாபல் (Mikel Oyarzabal) மற்றும் பெட்ரோ போரோ (Pedro Porro) ஆகியோர் அடித்த கோல்களால் வெற்றியைத் தன்வசப்படுத்தியது.

ஞாயிற்றுக்கிழமையன்று நியூயார்க் நியூ ஜெர்சி மைதானத்தில் (New York New Jersey Stadium) நடைபெறவுள்ள இறுதிப்போட்டியில், ஸ்பெயின் அணி , இங்கிலாந்து – அர்ஜென்டினா அணிகளுக்கு இடையேயான போட்டியில் வெற்றி பெறும் அணியை எதிர்கொள்ளும்.

ஸ்பெயின் அணி இதற்கு முன்பு விளையாடிய ஒரே ஒரு உலகக் கோப்பை இறுதிப்போட்டியில் (2010 இல் சாக்கர் சிட்டியில் நடந்த போட்டியில் ஆன்ட்ரெஸ் இனியெஸ்டா அடித்த கோல் மூலம் நெதர்லாந்தை வீழ்த்தி) சாம்பியன் பட்டம் வென்றிருந்தது குறிப்பிடத்தக்கது.

ஸ்பெயினின் முதல் கோல்

இப்போட்டியில் பிரான்ஸ் அணி வெற்றி பெற வாய்ப்புள்ள அணியாகக் கருதப்பட்டது. கைலியன் எம்பாப்பே (Kylian Mbappe) தொடக்கத்தில் அதிரடி காட்டினாலும், ஸ்பெயின் பயிற்சியாளர் லூயிஸ் டி லா ஃபுயெண்டேயின் குழுவிற்கு முதல் பெரிய வாய்ப்பை லமைன் யமால் (Lamine Yamal) ஏற்படுத்திக் கொடுத்தார்.

தனது 19-வது பிறந்தநாளுக்கு அடுத்த நாள் களமிறங்கிய இந்த விங்கர், லூகாஸ் டிக்னேவை (Lucas Digne) முந்தி பந்தைப் பிடித்தபோது பெனால்டி பாக்ஸிற்குள் வீழ்த்தப்பட்டார்.

கிடைத்த பெனால்டி வாய்ப்பை, பெனால்டிகளைத் தடுப்பதில் வல்லவரான பிரான்ஸ் கோல்கீப்பர் மைக் மைனானை (Mike Maignan) ஏமாற்றி ஓயார்சாபல் கோலாக மாற்றினார்.

இரண்டாவது கோல்

இந்த முன்னிலையை ஸ்பெயின் அணி மேலும் வலுப்படுத்தியது. பெட்ரோ போரோ, டானி ஓல்மோவுடன் (Dani Olmo) இணைந்து ஒரு நேர்த்தியான ‘ஒன்-டூ’ (one-two) பாஸிங் ஆட்டத்தை வெளிப்படுத்தி, பந்தை மீண்டும் பெற்று கீழ் மூலையில் (bottom corner) மிகத்துல்லியமாக அடித்து கோலாக்கினார்.

பிரான்ஸின் போராட்டம்

ஆட்டத்திற்குள் மீண்டும் வர பிரான்ஸ் அணி டெசிரே டூயே (Desire Doue) மற்றும் ராயன் செர்கி (Rayan Cherki) ஆகியோரை மாற்று ஆட்டக்காரர்களாகக் களமிறக்கி தீவிரமாக முயற்சித்தது.

இருப்பினும், ஸ்பெயின் கோல்கீப்பர் உனாய் சிமோன் (Unai Simon) ஒரு ‘ஸ்வீப்பர்-கீப்பராக’ (sweeper-keeper) சமயோசிதமாகச் செயல்பட்டார். மேலும் மார்க் குகுரெல்லா (Marc Cucurella), எம்பாப்பேயின் கோல் முயற்சியை ஒரு சிறந்த டேக்கிள் (challenge) மூலம் முறியடித்தார்.

ஆட்டத்தின் இறுதி விஸில் ஊதப்பட்டதும் ஸ்பெயின் ரசிகர்கள் பேரானந்தத்தில் திளைத்தனர்,
பிரான்ஸ் அணியினர் சோகத்தில் ஆழ்ந்தனர்.

பிரான்ஸ் அணிக்கு சனிக்கிழமையன்று வெண்கலப் பதக்கத்திற்கான (மூன்றாவது இடம்) போட்டியில் விளையாடும் வாய்ப்பு உள்ளது. அதில் சிறப்பாகச் செயல்பட்டு மீண்டும் ஒரு ‘அடிடாஸ் கோல்டன் பூட்’ (adidas Golden Boot) விருதை வெல்லும் தனது நம்பிக்கையை எம்பாப்பே அதிகரிக்கக்கூடும்.