பிரான்ஸ் பாணியில் இத்தாலியிலும் வன்முறை வெடிப்பு

இத்தாலியின் முக்கிய நகரங்களில் போர் எதிர்ப்பு மற்றும் வாழ்க்கைச் செலவு அதிகரிப்புக்கு எதிராக நடத்தப்பட்ட போராட்டங்களின்போது, சில இடங்களில் வன்முறைச் சம்பவங்களும் பொலிஸாருக்கும் போராட்டக்காரர்களுக்கும் இடையில் மோதல்களும் இடம்பெற்றுள்ளன.

கடந்த வார இறுதியில் நாடு முழுவதும் அமைதியின்மை ஏற்பட்டதைத் தொடர்ந்து, சனிக்கிழமை (ஒக்டோபர் 24) நடைபெற்ற போராட்டங்களைக் கட்டுப்படுத்த அதிகாரிகள் பலத்த பாதுகாப்பு ஏற்பாடுகளை மேற்கொண்டிருந்தனர். முன்னெச்சரிக்கை நடவடிக்கையாகப் பல வர்த்தக நிலையங்களும் மூடப்பட்டிருந்தன.

டுரின், ரோம் மற்றும் போலோன்யா ஆகிய நகரங்களில் போராட்டக்காரர்களுக்கும் பொலிஸாருக்கும் இடையில் மோதல்கள் இடம்பெற்றன. எனினும், மிலான் நகரில் போராட்டங்கள் பெரும்பாலும் அமைதியான முறையில் நடைபெற்றதாக ரொய்ட்டர்ஸ் செய்தி வெளியிட்டுள்ளது.

கடந்த வாரம் இடம்பெற்ற போராட்டங்களின்போது, போராட்டக்காரர்கள் பொலிஸாருடன் மோதியதுடன், வர்த்தக நிலையங்களைக் கொள்ளையிட்டதாகவும் பொதுச் சொத்துக்களைச் சேதப்படுத்தியதாகவும் தெரிவிக்கப்பட்டது. இதுபோன்ற சம்பவங்கள் மீண்டும் இடம்பெறுவதைத் தடுக்கும் நோக்கில் இம்முறை பாதுகாப்பு பலப்படுத்தப்பட்டது.

சமூக ஊடகங்கள் ஊடாக மேலும் போராட்டங்களுக்கு அழைப்புகள் விடுக்கப்பட்டதைத் தொடர்ந்து, முக்கிய நகரங்களில் அதிகளவிலான பொலிஸார் பணியில் ஈடுபடுத்தப்பட்டனர்.

இருப்பினும், சனிக்கிழமை நடைபெற்ற போராட்டங்களின்போது வர்த்தக நிலையங்கள் கொள்ளையிடப்பட்டதையோ சொத்துக்கள் சேதப்படுத்தப்பட்டதையோ தமது செய்தியாளர்கள் காணவில்லை என ரொய்ட்டர்ஸ் குறிப்பிட்டுள்ளது.

இதற்கிடையில், கடந்த வார இறுதியில் நடைபெற்ற போராட்டங்களை ஏற்பாடு செய்ததாகக் கூறப்படும் “ஒக்டோபர் 17 இயக்கம்” தொடர்புடையவர் எனச் சந்தேகிக்கப்படும் ஒருவரை இத்தாலிய பொலிஸார் கைது செய்து விசாரணைக்காக மிலான் பொலிஸ் தலைமையகத்துக்கு அழைத்துச் சென்றுள்ளனர்.

போர் எதிர்ப்பு மற்றும் வாழ்க்கைச் செலவு அதிகரிப்புக்கு எதிரான இந்தப் போராட்டங்கள், இத்தாலியில் நிலவும் சமூக மற்றும் பொருளாதார அதிருப்தியை மீண்டும் வெளிப்படுத்தியுள்ளன.