அறுவை சிகிச்சைக்குப் பின் குணமடைந்து வரும் போப் லியோ

நுரையீரல் புற்றுநோய் அறுவை சிகிச்சைக்கு பிறகு, போப் லியோவுக்கு மேற்கொண்டு எவ்வித சிகிச்சைகளும் தேவையில்லை என்று அவரது மருத்துவர்கள் தெரிவித்துள்ளனர். இதன் மூலம் அவரது கட்டியானது உடலின் மற்ற பகுதிகளுக்குப் பரவவில்லை என்பது உறுதி செய்யப்பட்டுள்ளது.

நவம்பர் 6 முதல் 17 வரை உருகுவே, அர்ஜென்டினா மற்றும் பெரு ஆகிய நாடுகளுக்குப் பயணம் செய்ய போப் திட்டமிட்டிருந்த நிலையில், அவர் அப் பயணத்தை மேற்கொள்வாரா என்பது குறித்து இன்னும் தெளிவான தகவல்கள் வெளியாகவில்லை.

71 வயதான போப் லியோவுக்கு ஒக்டோபர் 13 அன்று மேற்கொள்ளப்பட்ட அறுவை சிகிச்சையில், அவரது வலது நுரையீரலின் கீழ் பகுதி அகற்றப்பட்டது. அவருக்கு நுரையீரல் அடினோகார்சினோமா (lung adenocarcinoma) எனப்படும் மிகவும் பொதுவான வகை நுரையீரல் புற்றுநோய் இருப்பது கண்டறியப்பட்டது.

அகற்றப்பட்ட திசுக்களின் இறுதிக்கட்ட திசுவியல் ஆய்வுகள் மற்றும் மூலக்கூறு உயிரியல் பகுப்பாய்வுகள் மூலம் நோய் கண்டறிதல் உறுதி செய்யப்பட்டதுடன், அப் பாதிப்பு குறிப்பிட்ட பகுதியில் மட்டுமே உள்ளதாகவும் வத்திக்கான் வெளியிட்ட அறிக்கையில் மருத்துவர்கள் தெரிவித்துள்ளனர்.

“அதனைத் தொடர்ந்து மேற்கொள்ளப்பட்ட புற்றுநோயியல் மதிப்பீட்டில் (oncological evaluation), அவருக்கு மேற்கொண்டு எவ்வித சிகிச்சையும் தேவையில்லை என்பது உறுதி செய்யப்பட்டுள்ளது” என்று போப்பின் முதன்மை அறுவை சிகிச்சை நிபுணர் ஸ்டெபானோ மார்கரிட்டோரா மற்றும் அவரது தனிப்பட்ட மருத்துவர் லூய்கி கார்போன் ஆகியோர் தெரிவித்துள்ளனர்.

சனிக்கிழமையன்று மருத்துவமனையிலிருந்து விடுவிக்கப்பட்ட போப் லியோ, படிப்படியாகத் தனது வழக்கமான பணிகளைத் தொடங்கி வருகிறார். புதன்கிழமை அன்று, புனித பீட்டர் சதுக்கத்தில் யாத்ரீகர்களுடன் நடைபெறும் வாராந்திரக் கூட்டத்திற்கு அவர் மீண்டும் திரும்பினார்.

போப் லியோ தென் அமெரிக்காவிற்குப் பயணம் செய்வதற்கு “எந்தவொரு மருத்துவக் காரணங்களும்” தடையாக இல்லை என்று மார்கரிட்டோரா கடந்த வாரம் தெரிவித்திருந்தார். இருப்பினும், அவர் குணமடைவதற்கு வசதியாகத் தனது பயண அட்டவணையின் வேகத்தைக் குறைத்துச் சற்றே மாற்றியமைக்க வேண்டியிருக்கும் என்று வத்திக்கானின் வெளியுறவுச் செயலர் சுட்டிக்காட்டியுள்ளார்.