ஹோர்முஸ் நீரிணையை பாதுகாக்க புதிய கூட்டணி: NATO தளபதிகள் ஆலோசனை

ஹோர்முஸ் நீரிணைப் பகுதியில் கப்பல் போக்குவரத்தின் சுதந்திரத்தைப் பாதுகாப்பதற்கான சாத்தியமான வழிகள் மற்றும் பங்களிப்புகள் குறித்து ஆலோசிக்க, நேட்டோ அமைப்பின் உயர்மட்டத் தளபதி இந்த வாரத் தொடக்கத்தில் காணொளி வாயிலாகக் கூட்டம் ஒன்றை நடத்தினார் என்று அவரது செய்தித் தொடர்பாளர் ராய்ட்டர்ஸ் செய்தி நிறுவனத்திடம் தெரிவித்துள்ளார்.

மேலும், இது நேட்டோவின் நேரடி இராணுவ நடவடிக்கை (NATO Mission) அல்ல என்பதையும் அவர் தெளிவுபடுத்தியுள்ளார்.

நேட்டோ கூட்டமைப்பின் உயர்மட்டத் தளபதியும், அமெரிக்க விமானப்படை ஜெனரலுமான அலெக்ஸஸ் கிரின்கேவிச்சின் செய்தித் தொடர்பாளர் இது தொடர்பில் கருத்து வெளியிடுகையில்,

“ஹோர்முஸ் நீரிணையில் சர்வதேசக் கப்பல் போக்குவரத்தின் சுதந்திரத்தைப் பாதுகாப்பதற்கான முயற்சிகளில், விருப்பமுள்ள நேட்டோ உறுப்பு நாடுகள் தங்கள் பங்களிப்புகளை வழங்குவதற்கு வசதியாக, ஐரோப்பிய நேட்டோ கூட்டமைப்புத் தலைமையகம் (SHAPE) ஆகஸ்ட் 19 புதன்கிழமை அன்று உறுப்பு நாடுகளின் பாதுகாப்புப் படைகளின் தலைவர்கள் மட்டத்திலான கூட்டம் ஒன்றை நடத்தியது” எனக் குறிப்பிட்டுள்ளார்.

ஈரான் உடனான மோதல்களில் நேரடியாக ஈடுபடுவதைத் தவிர்க்கவே நேட்டோ உறுப்பு நாடுகள் விரும்புகின்றன.

அதற்குப் பதிலாக, உலகளவில் வர்த்தகம் செய்யப்படும் மொத்த கச்சா எண்ணெயில் ஐந்தில் ஒரு பங்கைக் கொண்டு செல்லும் முக்கியப் பாதையான ஹோர்முஸ் நீரிணையை மீண்டும் திறக்க, கூட்டமைப்பிற்கு வெளியே தனி திட்டங்களை வகுப்பதில் கவனம் செலுத்தி வருகின்றன.

பிராந்தியத்தில் பதற்றங்கள் தணிந்த பிறகு அல்லது மோதல்கள் முடிவுக்கு வந்த பிறகு, ஹோர்முஸ் நீரிணை வழியே பாதுகாப்பான கப்பல் போக்குவரத்தை உறுதி செய்ய, பிரான்ஸ் மற்றும் பிரித்தானியா ஆகியவை சுமார் 12 நாடுகளை உள்ளடக்கிய ஒரு புதிய கூட்டணியை உருவாக்கும் முயற்சிகளில் முன்னணியில் உள்ளன.

இருப்பினும், நீண்டகால அடிப்படையிலான எந்தவொரு பாதுகாப்பு ஏற்பாட்டிற்கும் ஈரானின் இணக்கம் அல்லது ஒப்புதல் இறுதியாகத் தேவைப்படும் என்பது குறிப்பிடத்தக்கது.