நெதர்லாந்தை வீழ்த்தி அடுத்த சுற்றுக்குள் நுழைந்தது மொராக்கோ

FIFA உலகக்கோப்பையின் மற்றொரு விறுவிறுப்பான ஆட்டத்தில், பலம் வாய்ந்த நெதர்லாந்து அணியை பெனால்டி ஷூட்-அவுட் முறையில் மொராக்கோ அணி வீழ்த்தி ‘Round of 16’ சுற்றுக்கு முன்னேறியுள்ளது.

நிர்ணயிக்கப்பட்ட ஆட்ட நேர முடிவில் இரு அணிகளும் 1-1 என சமநிலை வகித்ததால், வெற்றியாளரைத் தீர்மானிக்க பெனால்டி முறை கடைப்பிடிக்கப்பட்டது.

கடந்த உலகக்கோப்பையில் அரையிறுதி வரை சென்ற மொராக்கோ, இந்த வெற்றியின் மூலம் தனது பலத்தை மீண்டும் நிரூபித்துள்ளது.

மறுபுறம், நெதர்லாந்து அணி தனது உலகக்கோப்பை வரலாற்றிலேயே இவ்வளவு சீக்கிரமாக (முதலாவது நாக்-அவுட் சுற்றிலேயே) தொடரை விட்டு வெளியேறுவது இதுவே முதல் முறையாகும்.

ஆட்டத்தின் பெரும் பகுதியில் இரு அணிகளும் கோல் அடிக்க எடுத்த முயற்சிகள் தோல்வியடைந்தன. எனினும், ஆட்டத்தின் 72வது நிமிடத்தில் நெதர்லாந்தின் கிரிசென்சியோ சம்மர்வில் கொடுத்த பாஸை, நட்சத்திர வீரர் கோடி காக்போ (Cody Gakpo) கோலாக மாற்றினார்.

இந்த கோலை அடித்தவுடன் காக்போ மைதானத்திலேயே கண்ணீர் விட்டு அழுதார். நெதர்லாந்து மாற்று ஆட்டக்காரர்கள் அனைவரும் ஓடிவந்து அவரைக் கட்டிப்பிடித்து ஆறுதல் கூறினர்.

நெதர்லாந்து அணி வெற்றிக் கொண்டாட்டத்திற்குத் தயாராகிக் கொண்டிருந்த வேளையில், ஆட்டத்தின் கூடுதல் நேரத்தில் (91வது நிமிடம்) மொராக்கோவின் செம்ஸ்டின் தால்பி அடித்த லாங் கிராஸ் (Long cross) பந்தை, இசா தியோப் (Issa Diop) மிக அற்புதமாகத் தலையால் முட்டி கோலாக மாற்றினார்.

இதனால் ஆட்டம் 1-1 என சமநிலையை எட்டியது. அதன்பின் வழங்கப்பட்ட 30 நிமிட கூடுதல் நேரத்திலும் இரு அணிகளாலும் கோல் அடிக்க முடியவில்லை.

பெனால்டி ஷூட்-அவுட்டின் முதல் நான்கு சுற்றுகளின் முடிவில் இரு அணிகளும் 2-2 என சமநிலையில் இருந்தன. அப்போது நெதர்லாந்து அணியின் சம்மர்வில் அடித்த பெனால்டி பந்தை, மொராக்கோ கோல்கீப்பர் யாசின் புனோ (Yassine Bounou) தனது இடது கையால் தட்டிவிட்டு மிகச் சிறப்பாகத் தடுத்தார்.

அடுத்ததாக மொராக்கோவுக்குக் கிடைத்த வாய்ப்பில், இஸ்மாயில் சைபாரி (Ismael Saibari) பந்தை நெதர்லாந்து கோல்கீப்பருக்கு ஏமாற்றி இடது பக்க கீழ் மூலையில் அடித்து மொராக்கோவின் வரலாற்று வெற்றியை உறுதி செய்தார்.

சர்வதேச தரவரிசையில் 6வது இடத்தில் உள்ள மொராக்கோவும், 7வது இடத்தில் உள்ள நெதர்லாந்தும் மோதியதால் இப்போட்டி பெரும் எதிர்பார்ப்பை ஏற்படுத்தியிருந்தது.

திங்கட்கிழமை ஒரே நாளில் பெனால்டி முறையில் முடிவு தெரிந்த இரண்டாவது போட்டி இதுவாகும். முன்னதாக ஜெர்மனியைப் பராகுவே அணி பெனால்டியில் வீழ்த்தியிருந்தது குறிப்பிடத்தக்கது.