UEFA நேஷன்ஸ் லீக்: துருக்கியை வீழ்த்தி பிரான்ஸ் வெற்றி

புதிய பயிற்சியாளர் ஜினெடின் ஜிதேனின் (Zinedine Zidane) தலைமையில் களம் கண்ட முதல் போட்டியில், பிரான்ஸ் அணி 1-0 என்ற கோல் கணக்கில் துருக்கியை (Turkiye) வீழ்த்தி UEFA நேஷன்ஸ் லீக் (UEFA Nations League) தொடரில் வெற்றி பெற்றது.

இருப்பினும், போட்டியின் ஒரே கோலை அடித்த நட்சத்திர வீரர் கிலியன் எம்பாப்பே (Kylian Mbappe) முழங்கால் காயத்தால் பாதியிலேயே வெளியேறியது பிரான்ஸ் அணிக்கு பெரும் கவலையை ஏற்படுத்தியுள்ளது.

சமீபத்தில் முடிந்த உலகக்கோப்பையில் முன்னாள் பயிற்சியாளர் டிடியர் டெஷாம்ப்ஸின் கீழ் மைய முன்கள வீரராக களமிறக்கப்பட்டு, 10 கோல்களுடன் அதிக கோல் அடித்த வீரராகப் ஜொலித்த எம்பாப்பேயை, புதிய பயிற்சியாளர் ஜிதேன் இந்த முறை இடதுபுற விங் (left wing) நிலைக்கு மாற்றினார்.

பிரான்ஸ் அணியின் வரலாற்றுச் சாதனை கோல் மெஷினான எம்பாப்பே, மைக்கேல் ஒலிஸே (Michael Olise) அளித்த அழகான பாஸை கட்டுப்படுத்தி, இடது புறத்திலிருந்து தாழ்வாக உதைத்துத் தனது 67-வது சர்வதேச கோலைப் பதிவு செய்தார்.

இஸ்மிட்டில் உள்ள கொகேலி மைதானத்தில் (Kocaeli Stadium) கோலை அடித்த பிறகு, சக வீரர்கள் அதைக் கொண்டாட வந்தபோது எம்பாப்பே வலியால் துடித்தார். சிகிச்சை பெற்ற பிறகும் அவரால் விளையாட்டைத் தொடர முடியவில்லை.

இடது முழங்காலில் ஏற்பட்ட காயம் காரணமாக அவர் உடனடியாக மைதானத்தில் அமர்ந்தார். பின்னர் அவருக்கு மாற்றாக டெசயர் டூவே (Desire Doue) களமிறக்கப்பட்டார்.

அடுத்த 10 நாட்களில் பிரான்ஸ் அணி மேலும் மூன்று போட்டிகளில் விளையாடவுள்ள நிலையில், எம்பாப்பேயின் காயத்தின் தன்மை குறித்து பிரான்ஸ் தேசிய அணியும், அவரது ரியல் மாட்ரிட் கிளப் நிர்வாகமும் மிகுந்த கவலையோடு காத்திருக்கின்றன.

1998 உலகக்கோப்பை நாயகனான ஜிதேன், 2021-ல் ரியல் மாட்ரிட் பயிற்சியாளர் பதவியில் இருந்து விலகிய பிறகு முதன்முறையாக மீண்டும் பயிற்சியாளராகப் பொறுப்பேற்றுள்ளார்.

உலகக்கோப்பை அரை இறுதியில் ஸ்பெயினிடம் தோல்வியடைந்த பிரான்ஸ் அணி, தற்போது நேஷன்ஸ் லீக் ‘A1’ பிரிவில் இடம்பெற்றுள்ளது.

அவர்கள் தங்களது அடுத்த போட்டியில் பிரஸ்ஸல்ஸில் பெல்ஜியத்தை எதிர்கொள்கின்றனர்.