மதுபானக் கடைகள் திறந்திருக்கும் நேரத்தில் மாற்றம்!! டயானா மகிழ்ச்சி

மதுபானக் கடைகள் மற்றும் மதுபானசாலைகள் திறந்திருக்கும் நேரத்தை நெகிழ்வாகக் கொண்டுவருவதற்கான வரவு செலவுத் திட்ட முன்மொழிவை இராஜாங்க அமைச்சர் டயானா கமகே வரவேற்றுள்ளார்.

சட்டவிரோத மதுபான விற்பனையை தடுக்கும் வகையில் பார்கள் மற்றும் மதுபானக் கடைகளுக்கு நெகிழ்வான திறந்திருக்கும் நேரங்களை அறிமுகப்படுத்த 2024 வரவு செலவுத் திட்டத்தில் ஜனாதிபதியால் முன்மொழிவு செய்யப்பட்டது.

சுற்றுலா ஊக்குவிப்பு செயற்பாடுகள் தொடர்பான ஒழுங்குமுறைகள் மற்றும் மென் மதுபான அனுமதிப்பத்திரத்திற்கான புதிய கொள்கையொன்றை திருத்துவதற்கு ஜனாதிபதி ரணில் விக்கிரமசிங்கவினால் முன்மொழியப்பட்டது.

இது குறித்து கொழும்பு ஆங்கில ஊடகம் ஒன்றிடம் பேசிய டயானா கமகே,

“இந்த முன்மொழிவு குறித்து நான் மகிழ்ச்சியடைகிறேன், மேலும் இலங்கையில் சட்டவிரோதமான மதுபான விற்பனையை நிறுத்துவதற்கான ஒருவித முறைமை இருக்க வேண்டிய நேரம் இது” என்று அவர் கூறினார்.

மதுபானக் கடைகள் மற்றும் மதுபானசாலைகளை மூடும் நேரத்தை நீடிக்க வேண்டியதன் அவசியத்தை எடுத்துரைத்த அதேவேளை, அவை 24 மணி நேரமும் திறந்திருக்க வேண்டும் என்றும் டயானா கமகே முன்மொழிந்தார்.