மோசடி அரசுக்கு தலையிடியாக மாறியுள்ள “கரப்பான் பூச்சி” இயக்கம்

கல்வித்துறை அமைச்சர் தர்மேந்திர பிரதானின் ராஜினாமாவை வலியுறுத்தி, இந்தியாவில் இளைஞர்களால் முன்னெடுக்கப்படும் ‘காக்ரோச்’ (Cockroach Movement) அமைப்பைச் சேர்ந்த நூற்றுக்கணக்கான ஆதரவாளர்கள் நாடாளுமன்றத்தை நோக்கிப் பேரணி செல்ல இன்று புதுடெல்லியில் திரண்டனர்.

பிரதமர் நரேந்திர மோடியின் மூன்றாவது ஆட்சிக் காலத்தில், அவருக்கு எதிராக உருவெடுத்துள்ள மிகப்பெரிய மக்கள் சவாலாக இந்த இயக்கம் பார்க்கப்படுகிறது.

சமூக வலைதளங்களில் மில்லியன் கணக்கான ஆதரவாளர்களைப் பெற்றுள்ள இந்த இயக்கம், களத்திலும் வலுவான ஆதரவைத் திரட்டி வருகிறது.

போராட்டம் தீவிரமடைந்தது ஏன்?

கடந்த சனிக்கிழமை, உண்ணாவிரதப் போராட்டத்தில் ஈடுபட்ட சமூக ஆர்வலர் சோனம் வாங்சுக்கை (Sonam Wangchuk) காவல்துறையினர் வலுக்கட்டாயமாக மருத்துவமனைக்கு மாற்றினர். இதன் காரணமாக நாடு முழுவதும் அதிர்வலைகள் ஏற்பட்டன.

நாடாளுமன்றத்தின் பருவமழைக் கூட்டத்தொடரின் முதல் நாளான இன்று, ‘ஜந்தர் மந்தர்’ பகுதியில் ஆயிரக்கணக்கான இளைஞர்களும் ஆதரவாளர்களும் திரண்டனர்.

அசம்பாவிதங்களைத் தடுக்கப் பலத்த போலீஸ் மற்றும் அதிரடிப் படையினர் குவிக்கப்பட்டு, தடுப்புகள் அமைக்கப்பட்டதால் அங்குப் பெரும் பரபரப்பான சூழல் நிலவுகிறது.

போராட்டக்காரர்கள் “தர்மேந்திர பிரதான் பதவி விலகு”, “நரேந்திர மோடி பதவி விலகு” என இந்தியில் கோஷங்களை எழுப்பினர்.

‘காக்ரோச் ஜன்டா கட்சி’ உருவான பின்னணி

கடந்த மே மாதம் நடைபெற்ற தேசிய மருத்துவ நுழைவுத் தேர்வின் (NEET) வினாத்தாள்கள் கசிந்ததைத் தொடர்ந்து, ‘காக்ரோச் ஜன்டா கட்சி’ (CJP) என்ற இந்த இயக்கம் உருவானது.

வினாத்தாள் கசிவால் 20 லட்சத்திற்கும் மேற்பட்ட மாணவர்கள் பாதிக்கப்பட்டு, மீண்டும் தேர்வு எழுத வேண்டிய கட்டாயத்திற்குத் தள்ளப்பட்டனர்.

இன்ஸ்டாகிராமில் குறுகிய நாட்களில் 22 மில்லியன் (2.2 கோடி) பின்பற்றுபவர்களைப் பெற்ற இந்த இயக்கம், தற்போது பல எதிர்க்கட்சிகளின் ஆதரவையும் பெற்றுள்ளது. CJP நிறுவனர் அபிஜித் திப்கே மற்றும் வாங்சுக் ஆகியோர் கல்வி அமைச்சரின் ராஜினாமாவை வலியுறுத்தித் தொடர் போராட்டங்களை நடத்தி வருகின்றனர்.