செக் குடியரசில் அரசியல் திருப்பம்: செனட் தேர்தலில் எதிர்க்கட்சிகள் முன்னிலை

செக் குடியரசில் சனிக்கிழமை நடைபெற்ற செனட் (மேலவை) தேர்தலில் எதிர்க்கட்சிகள் அதிக ஆசனங்களைக் கைப்பற்றியுள்ளன. அதேவேளை, பிரதமர் ஆண்ட்ரேஜ் பாபிஸின் ANO கட்சி போட்டியிட்ட எந்தவொரு ஆசனத்தையும் வெல்லத் தவறியுள்ளது. கடந்த ஆண்டு ஆட்சிப் பொறுப்பேற்ற பின்னர் அரசாங்கம் எதிர்கொண்ட முக்கிய தேர்தல் சோதனைகளில் ஒன்றாக இந்தத் தேர்தல் அமைந்துள்ளது.

81 உறுப்பினர்களைக் கொண்ட செனட்டில் மூன்றில் ஒரு பங்கு ஆசனங்களுக்குத் தேர்தல் நடைபெற்றது. செனட்டில் ஏற்கனவே எதிர்க்கட்சிகள் பெரும்பான்மையைக் கொண்டுள்ள நிலையில், மேலும் பல ஆசனங்களைக் கைப்பற்ற ANO கட்சி எதிர்பார்த்திருந்தது.

தேர்தல் முடிவை பேரழிவானது எனப் பிரதமர் பாபிஸ் சுட்டிக்காட்டியுள்ளார். எனினும், இந்தத் தேர்தல் பின்னடைவு, ஐரோப்பிய ஒன்றியத்தின் மீதான விமர்சன அணுகுமுறையைக் கொண்ட கட்சிகள் மற்றும் வலதுசாரி, தீவிர வலதுசாரிக் கட்சிகளை உள்ளடக்கிய அவரது கூட்டணி அரசாங்கத்தின் நிலைத்தன்மையைப் பாதிக்கும் சாத்தியம் குறைவாகவே காணப்படுகிறது.

ஆட்சிக்கு வந்ததிலிருந்து, ரஷ்யாவுடனான போரில் உக்ரைனுக்கு அரசாங்கம் நேரடியாக வழங்கி வந்த இராணுவ உதவியை பாபிஸ் தலைமையிலான அரசாங்கம் நிறுத்தியுள்ளது. அத்துடன், ஐரோப்பிய ஒன்றியத்தின் காலநிலைக் கொள்கைகளுக்கும் சவால் விடுத்து வருகிறது.

எனினும், நாட்டின் முக்கிய சட்டவாக்க அமைப்பாக கீழவை தொடர்ந்து செயற்படுகிறது. செனட் சபை நிராகரிக்கும் சட்டமூலங்களை கீழவை மீண்டும் நிறைவேற்ற முடியும் என்பதால், அரசாங்கத்தின் சட்டவாக்க நடவடிக்கைகளைத் தடுக்கும் செனட்டின் அதிகாரம் வரையறுக்கப்பட்டுள்ளது.

இருப்பினும், அரசியலமைப்புத் திருத்தங்களுக்கு ஒப்புதல் வழங்குதல், அரசியலமைப்பு நீதிமன்றத்துக்கான நீதிபதிப் பரிந்துரைகளை உறுதிப்படுத்துதல் மற்றும் செனட்டின் தலைவரைத் தெரிவுசெய்தல் உள்ளிட்ட முக்கிய பொறுப்புகளை செனட் கொண்டுள்ளது. செனட் தலைவரே, ஜனாதிபதிக்கு அடுத்த நிலையில் நாட்டின் இரண்டாவது உயரிய அரசுப் பதவியை வகிக்கிறார்.

தேர்தல் பின்னடைவு ஏற்பட்ட போதிலும், தேசிய கருத்துக் கணிப்புகளில் ANO கட்சி தொடர்ந்து முன்னிலை வகித்து வருகிறது.

ஊதியங்கள், ஓய்வூதியங்கள் மற்றும் போக்குவரத்துத் துறைக்கான முதலீடுகளை அதிகரிக்கும் நோக்கில் அரசாங்கம் நிதிக் கொள்கைகளைத் தளர்த்தியுள்ளது. 1.09 கோடி மக்கள் வசிக்கும் செக் குடியரசில், பாரம்பரியமாகக் கடைப்பிடிக்கப்படும் சிக்கனமான நிதி அணுகுமுறைக்கு மாறான இந்த நடவடிக்கைகள் விமர்சனங்களையும் எதிர்கொண்டுள்ளன.

செனட் தேர்தலின் இரண்டாம் சுற்று வாக்குப்பதிவு வெள்ளிக்கிழமையும் சனிக்கிழமையும் நடைபெற்றது. முதல் சுற்று வாக்குப்பதிவு கடந்த வார இறுதியில் இடம்பெற்றிருந்தது. இரண்டாம் சுற்றில் வாக்காளர் பங்கேற்பு குறைவாகக் காணப்பட்டது.

செக் குடியரசின் தேர்தல் முறையின்படி, முதல் சுற்றில் எந்தவொரு வேட்பாளரும் 50 சதவீதத்துக்கும் அதிகமான வாக்குகளைப் பெறாவிட்டால், அதிக வாக்குகளைப் பெற்ற முதல் இரண்டு வேட்பாளர்கள் இரண்டாம் சுற்றுக்குத் தகுதி பெறுவர்.

இந்தத் தேர்தலில் ஐரோப்பிய ஆதரவு நிலைப்பாட்டைக் கொண்ட மேயர்கள் மற்றும் சுயேச்சைகள் கட்சி (Mayors and Independents) குறிப்பிடத்தக்க வெற்றியைப் பெற்றுள்ளது. அது போட்டியிட்ட 14 ஆசனங்களில் 10 ஆசனங்களைக் கைப்பற்றியது. அவற்றில் இரண்டு ஆசனங்கள் முதல் சுற்றிலேயே வெற்றிகொள்ளப்பட்டன. சிவிக் டெமாக்ரட்ஸ் கட்சி ஏழு ஆசனங்களைப் பெற்றது.

இதற்கு முன்னதாக, கடந்த வார இறுதியில் நடைபெற்ற உள்ளூராட்சித் தேர்தலிலும் ANO கட்சி பின்னடைவைச் சந்தித்திருந்தது. நாட்டின் 13 பிராந்தியத் தலைநகரங்களில் ஆறு நகரங்களில் மட்டுமே அக்கட்சி வெற்றி பெற்றது. நான்கு ஆண்டுகளுக்கு முன்னர் நடைபெற்ற தேர்தலில் எட்டு நகரங்களைக் கைப்பற்றியிருந்தமை குறிப்பிடத்தக்கது.