இறக்கைகளில் விரிசல்: மீண்டும் சர்ச்சையில் ஏர்பஸ் A380

எமிரேட்ஸ் (Emirates) மற்றும் குவாண்டாஸ் (Qantas) ஆகிய விமான நிறுவனங்கள் பயன்படுத்தும் ஏர்பஸ் A380 ரக விமானங்களின் இறக்கைப்பகுதியில் உள்ள முக்கிய பாகத்தில் விரிசல்கள் கண்டறியப்பட்டுள்ளன.

இதனால் 16 விமானங்களை சோதனைக்கு உட்படுத்த உள்ளதாகவும், அதில் 5 விமானங்களை உடனடியாகச் சோதிக்கப்படவுள்ளன எனவும் ஏர்பஸ் Airbus நிறுவனம் தெரிவித்துள்ளது.

வழக்கமான பராமரிப்புப் பணிகளின் போது இந்த விரிசல்கள் கண்டறியப்பட்டதை அடுத்து, பாதிக்கப்பட்ட விமானங்களின் இறக்கை-விட்டக் கட்டமைப்பை (Wing-spar structure) உடனடியாகப் பரிசோதிக்குமாறு ஐரோப்பிய ஒன்றிய விமானப் போக்குவரத்து பாதுகாப்பு முகமை (EASA) விமான நிறுவனங்களுக்கு உத்தரவிட்டுள்ளது.

விமானத்தின் இறக்கை வழியாகச் செல்லும் மற்றும் பறக்கும் போது காற்றின் அழுத்த பாரத்தைத் தாங்கும் முக்கியக் கட்டமைப்புப் பகுதியிலேயே இந்த விரிசல்கள் ஏற்பட்டுள்ளன.

பரிசோதனை செய்யப்பட வேண்டிய 16 விமானங்களில், 15 விமானங்கள் எமிரேட்ஸ் நிறுவனத்தாலும், ஒரு விமானம் குவாண்டாஸ் நிறுவனத்தாலும் இயக்கப்படுபவை ஆகும்.

இதில் உடனடியாகச் சோதிக்கப்பட வேண்டிய 5 விமானங்களும் எமிரேட்ஸ் நிறுவனத்திற்குச் சொந்தமானவை. அவற்றுக்கான பரிசோதனைகள் புதன்கிழமையன்றே தொடங்கப்படவுள்ளன.

எமிரேட்ஸ், சிங்கப்பூர் ஏர்லைன்ஸ், பிரிட்டிஷ் ஏர்வேஸ், குவாண்டாஸ், லுப்தான்சா, கத்தார் ஏர்வேஸ், கொரியன் ஏர், எதிஹாத் ஏர்வேஸ், ஏ.என்.ஏ (ANA) மற்றும் ஆசியானா ஏர்லைன்ஸ் உள்ளிட்ட பல நிறுவனங்கள் இந்த A380 ரக விமானங்களைப் பயன்படுத்துகின்றன.

இதில் உலகிலேயே மிக அதிகமான A380 ரக விமானங்களைக் கொண்ட நிறுவனம் எமிரேட்ஸ் ஆகும். தற்போது பயன்பாட்டில் உள்ள மொத்த ‘சூப்பர் ஜம்போ’ ரக விமானங்களில் பாதியாக்கும் மேல் எமிரேட்ஸ் நிறுவனமே இயக்குகிறது.

2025 டிசம்பரில் EASA பிறப்பித்த உத்தரவின்படி நடத்தப்பட்ட சோதனைகளின் போது, “இறக்கையின் வலிமையைக் குறைக்கக்கூடிய” இந்த விரிசல்கள் கண்டறியப்பட்டதாக ஐரோப்பிய விமானத் தயாரிப்பு நிறுவனமான ஏர்பஸ் தெரிவித்துள்ளது.

ஒரே மாதிரியான உற்பத்தி வரலாற்றைக் கொண்ட அனைத்து A380 விமானங்களும் தற்போது அடையாளம் காணப்பட்டுள்ளன.

இந்த விமானங்களுக்குப் பழுதுபார்ப்புப் பணிகள் தேவையா என்பது குறித்து EASA-வுடன் ஆலோசித்து முடிவு எடுக்கப்படும் என்று ஏர்பஸ் நிறுவனத்தின் செய்தித் தொடர்பாளர் தெரிவித்துள்ளார்.