45 வயதை நெருங்கும் ஆண்டர்சனுக்கு அதிர்ச்சி: புதிய ஒப்பந்தம் வழங்காத லங்காஷயர்

இங்கிலாந்து கிரிக்கெட் அணியின் முன்னணி வேகப்பந்து வீச்சாளரான ஜேம்ஸ் ஆண்டர்சன், லங்காஷயர் கவுண்டி Lancashire அணியிலிருந்து விடுவிக்கப்பட்டமை குறித்து தனது வருத்தத்தை வெளிப்படுத்தியுள்ளார். எனினும், தனது கிரிக்கெட் வாழ்க்கையை முடிவுக்குக் கொண்டுவருவது குறித்து அவர் இதுவரை உறுதியான அறிவிப்பை வெளியிடவில்லை.

2001ஆம் ஆண்டு முதல் லங்காஷயர் அணிக்காக விளையாடிவந்த 44 வயதான ஆண்டர்சனுக்கு, 2027ஆம் ஆண்டுக்கான புதிய ஒப்பந்தம் வழங்கப்படமாட்டாது என அணி நிர்வாகம் அறிவித்துள்ளது.

இதுகுறித்து இன்ஸ்டாகிராமில் பதிவிட்ட அவர், “முடிவு இப்படியாக அமைந்திருக்காவிட்டால் நன்றாக இருந்திருக்கும். இருப்பினும், எதிர்காலத்தில் வீரர்களுக்கும் ரசிகர்களுக்கும் எனது வாழ்த்துகள்” எனக் குறிப்பிட்டுள்ளார்.

அடுத்த ஆண்டு 45 வயதை எட்டவுள்ள ஆண்டர்சன், 2027ஆம் ஆண்டு கோடைகாலம் வரை விளையாடத் திட்டமிட்டிருந்தார். லங்காஷயரிலிருந்து அவர் விடுவிக்கப்பட்டதைத் தொடர்ந்து, அவரை ஒப்பந்தம் செய்வதில் ஏனைய கவுண்டி அணிகளும் ஆர்வம் காட்டுவதாகத் தெரிவிக்கப்பட்டுள்ளது.

கடந்த பருவத்தில் கவுண்டி சம்பியன்ஷிப் இரண்டாம் பிரிவில் லங்காஷயர் அணி கடைசிக்கு முந்தைய இடத்தைப் பிடித்திருந்தது. அடுத்த மூன்று முதல் நான்கு ஆண்டுகளுக்குள் சம்பியன்ஷிப் பட்டத்தை வெல்லும் நோக்கில் அணியை மறுசீரமைக்கத் திட்டமிட்டுள்ளதாக கிரிக்கெட் இயக்குநர் போல் பார்பிரேஸ் தெரிவித்துள்ளார். இதன் ஒரு பகுதியாகவே ஆண்டர்சனின் ஒப்பந்தத்தை நீடிக்க வேண்டாம் என முடிவெடுக்கப்பட்டதாகவும் அவர் கூறியுள்ளார்.

சர்வதேச கிரிக்கெட்டில் 911 விக்கெட்டுகளைக் கைப்பற்றியுள்ள ஆண்டர்சன், இங்கிலாந்தின் அதிக விக்கெட்டுகளைக் கைப்பற்றிய வீரர் என்ற சாதனையைப் பெற்றுள்ளார். லங்காஷயர் அணிக்காகவும் முதல்தரக் கிரிக்கெட்டில் 443 விக்கெட்டுகளை வீழ்த்தியுள்ளார்.

2024ஆம் ஆண்டு இங்கிலாந்து அணிக்கான அவரது சர்வதேச கிரிக்கெட் வாழ்க்கை முடிவுக்கு வந்தபோதிலும், தொடர்ந்து உள்ளூர் போட்டிகளில் விளையாடி வந்தார். 2026ஆம் ஆண்டு லங்காஷயர் அணியின் கவுண்டி சம்பியன்ஷிப் தலைவராகச் செயற்பட்ட அவர், இரண்டாம் பிரிவில் 50 விக்கெட்டுகளைக் கைப்பற்றி, அணியின் சிறந்த சம்பியன்ஷிப் வீரர் விருதையும் பெற்றார்.

“சிறுவயதிலிருந்தே லங்காஷயர் அணிக்கு ஆதரவளித்தேன். அந்த அணிக்காக 25 ஆண்டுகள் விளையாடியமை எனது கனவு நனவானதைப் போன்றது. ஓல்ட் டிராஃபோர்டு மைதானத்தில் விளையாடிய அனுபவங்களும், அணியின் தலைவராகச் செயற்பட்டமையும் மறக்க முடியாதவை” என அவர் தெரிவித்துள்ளார்.