காஞ்சன விஜேசேகரவுக்கு மொட்டு கட்சியில் உயர் பதவி?
முன்னாள் அமைச்சர் காஞ்சன விஜேசேகரவுக்கு ஸ்ரீலங்கா பொதுஜன பெரமுன கட்சியின் பிரதித் தலைவர் பதவி வழங்கப்படவுள்ளதாக வெளியாகும் தகவல்களை அக்கட்சியின் பொதுச்செயலாளர் சாகர காரியவசம் நிராகரித்துள்ளார்.
ஸ்ரீலங்கா பொதுஜன பெரமுன கட்சியின் உறுப்பினரான காஞ்சன விஜேசேகர கடந்த ஜனாதிபதி தேர்தலின்போது ரணில் விக்கிரமசிங்கவுக்கு ஆதரவளித்தார்.
கடந்த பொதுத்தேர்தலிலும் ரணில் சார்பு அணியிலேயே இருந்தார்.
இந்நிலையில் காஞ்சன விஜேசேகர மீண்டும் மொட்டு கட்சி பக்கம் வரவுள்ளார் எனவும், அவருக்கு பிரதித் தலைவர் பதவி வழங்கப்படவுள்ளதாகவும் தகவல் வெளியாகியுள்ளது என சாகர காரியவசத்திடம் கேள்வி எழுப்பட்டது.
தனியார் ஊடகமொன்றுக்கு வழங்கிய நேர்காணலின்போதே இந்த கேள்வி எழுப்பட்டது.
இதற்கு பதிலளித்த அவர் கூறியவை வருமாறு,
“ காஞ்சன விஜேசேகர எமது கட்சிக்கு வருவாரானால் மகிழச்சி. அவருடன் நாம் பேச்சு நடத்தினோம், ஆனால் மீண்டும் அரசியலுக்கு வரும் எண்ணம் அவரிடம் இல்லை என தெரிவித்தார்.
சிலவேளை மீண்டும் அரசியலுக்கு வந்தால்கூட எமது கட்சிக்கே வருவார்.
எமது கட்சியில் பிரதித் தலைவர் என ஒரு பதவி இல்லை. அதனை உருவாக்குவதாயின் கட்சி யாப்பையும் திருத்த வேண்டும். ஆனால் இவ்வாறு எந்த பேச்சும் நடத்தப்படவில்லை.”- என்றார் சாகர காரியவசம்.
