ரஷ்யா மீது கடுமையான தாக்குதல்களை நடத்திய உக்ரைன்

போர்முனையிலிருந்து வெகு தொலைவில் உள்ள பகுதிகளைக் குறிவைத்து, ரஷ்யாவின் எரிசக்தித் துறையை இலக்காகக் கொண்ட புதிய தொடர் தொலைதூரத் தாக்குதல்களுக்கு உக்ரைன் பொறுப்பேற்றுள்ளது.

கிராஸ்னோடார் பிராந்தியத்தில் உள்ள போல்டாவ்ஸ்கா எண்ணெய் கிடங்கும், உஃபா நகரில் உள்ள இரண்டு முக்கிய எண்ணெய் சுத்திகரிப்பு நிலையங்களும் இந்தத் தாக்குதல்களுக்கு உள்ளானதாகத் தெரிவிக்கப்பட்டுள்ளது.

தாக்கப்பட்ட உஃபா நகரில் உள்ள பாஷ்நெஃப்ட்-உஃபானெஃப்டெகிம் மற்றும் பாஷ்நெஃப்ட்-நோவோயில் சுத்திகரிப்பு நிலையங்கள், தற்போதைய போர் முன்னணியிலிருந்து சுமார் 1,500 கிலோமீட்டர் தொலைவில் அமைந்துள்ளன.

ரஷ்யப் பிரதேசத்தின் ஆழமான பகுதிகளுக்குள் தாக்குதல்களைத் தொடுப்பதற்கான வளர்ந்து வரும் ஆயுதத் திறன்களை இது தெளிவாகக் காட்டுகிறது என்று பாதுகாப்பு ஆய்வாளர்கள் கூறுகின்றனர்.

பின்னர் இந்தத் தாக்குதல்களை உறுதிப்படுத்திய உக்ரைன் அதிபர் வொலோடிமிர் ஜெலென்ஸ்கி, இது ரஷ்யா மீது “நீண்டகாலத் தடைகளை” விதிக்கும் உக்ரைனின் உத்தியின் ஒரு பகுதி என்று கூறினார்.

இருப்பினும், இந்தத் தாக்குதல்கள் குறித்து ரஷ்ய அரசாங்கம் இதுவரை அதிகாரப்பூர்வ அறிக்கை எதையும் வெளியிடவில்லை என்பதும் குறிப்பிடத்தக்கது.