சுவீடனில் மீண்டும் பிரதமர் பதவியை குறிவைக்கிறார் Magdalena Andersson

மோதலுக்கு பதிலாக ஒத்துழைப்பு அரசியலையே ஸ்வீடன் சோசலிஸ்ட் ஜனநாயகக் கட்சியின் தலைவரான மேக்டலினா ஆண்டர்சன் Magdalena Andersson வாக்காளர்கள், முன்னிலையில் முன்வைத்துள்ளார்.

சுவீடனில் ஞாயிற்றுக்கிழமை (13) நடைபெறவுள்ள தேர்தலில் மீண்டும் பிரதமர் பதவியைக் கைப்பற்ற அவர் தீவிரம் காட்டி வருகிறார்.

தேசிய அளவிலான முன்னாள் நீச்சல் வீராங்கனையான ஆண்டர்சனை, கடின உழைப்பாளி மற்றும் கடுமையான அதிகாரி என்று சக ஊழியர்கள் குறிப்பிடுகின்றனர். இவர் 2021-ஆம் ஆண்டில் ஸ்வீடனின் முதல் பெண் பிரதமராகப் பொறுப்பேற்றார்.

கூட்டணி தோழமைக் கட்சி விலகியதால், பொறுப்பேற்ற 12 மணி நேரத்திற்குள் ராஜினாமா செய்து, நாட்டின் மிகக் குறுகிய காலம் பதவி வகித்த பிரதமர் என்ற பதிவையும் இவர் பெற்றார்.

இருப்பினும், சில நாட்களுக்குப் பிறகு ஒற்றைக் கட்சி சிறுபான்மை அரசின் தலைவராக மீண்டும் பொறுப்பேற்று, 10 மாத ஆட்சிக் காலத்தை நிறைவு செய்தார்.

பிரதமராக இருந்தபோது, கோவிட் பெருந்தொற்றுச் சூழல் மற்றும் உக்ரைன் மீதான ரஷ்ய படையெடுப்பைத் தொடர்ந்து ஸ்வீடனின் நேட்டோ (NATO) உறுப்பினர் சேர்க்கைக்கான விண்ணப்பம் போன்ற முக்கிய விவகாரங்களை அவர் கையாள வேண்டியிருந்தது.

2022 தேர்தலில் ஆட்சியை இழந்தபோதிலும், ஸ்வீடன் மக்களால் அதிக நம்பிக்கைக்குரிய அரசியல்வாதியாக அவரே இன்றும் பார்க்கப்படுகிறார் என கருத்துக்கணிப்புகள் தெரிவிக்கின்றன.

வலதுசாரி ஆதரவு பெற்ற மைய-வலதுசாரி அரசு கடந்த நான்காண்டுகளாக குடியேற்றக் கட்டுப்பாடுகளைத் தீவிரப்படுத்தி, ஸ்வீடனின் பாரம்பரிய தாராளமய அரசியலிலிருந்து விலகியிருந்த சூழலில், 59 வயதான ஆண்டர்சன் தம்மை ஒரு ஒருங்கிணைக்கும் சக்தியாக முன்னிறுத்தியுள்ளார்.