இத்தாலி கண்ட தீரமிக்க மனித உரிமைப் போராளியின் வாழ்வு முடிந்தது
இத்தாலியின் மூத்த மனித உரிமைப் போராளியும் அரசியல் தலைவருமான எம்மா போனினோ Emma Bonino காலமானார்.
உறுதியும் துணிச்சலும் கொண்ட போனினோ, சமூக நீதி மற்றும் பாலின சமத்துவத்திற்காக தீவிரமாக குரல் கொடுத்தவர். உள்நாட்டிலும் வெளிநாட்டிலும் தனது இலக்குகளை அடைய சர்ச்சை தரும் வழிகளையும் அவர் துணிச்சலாகக் கையாண்டார்.
இத்தாலிய அரசியலில் எம்மா போனினோவின் Emma Bonino பயணம் ஒரு சட்டவிரோதச் சம்பவத்துடனேயே தொடங்கியது.
1974-ஆம் ஆண்டு, இத்தாலியில் கருக்கலைப்பு சட்டவிரோதமாக இருந்த காலத்தில், தனது திட்டமிடப்படாத கர்ப்பத்தை கலைப்பதற்காக புளோரன்ஸில் உள்ள ஒரு ரகசிய மருத்துவமனைக்கு அவர் செல்ல வேண்டியிருந்தது.
“இரவில் ரயிலில் திரும்பி வரும்போது, இனி ஒருபோதும் யாருக்கும் இத்தகைய அவமானம் நிகழக் கூடாது என்று உறுதியெடுத்தேன்,” என அவர் பின்னர் நினைவுகூர்ந்தார்.
அடுத்த ஆண்டே, கருக்கலைப்பு தொடர்பான கட்டுப்பாடுகளை உடைத்தெறியும் நோக்கில், அவர் காவல் துறையிடம் சரணடைந்தார்; தனது தனிப்பட்ட குற்றத்தைஒரு பகிரங்க எதிர்ப்பாக மாற்றினார்.
இந்தக் கைது நடவடிக்கை பத்திரிகைகளில் தலைப்புச் செய்தியானதுடன், 1978-ஆம் ஆண்டு இத்தாலியில் கருக்கலைப்பு சட்டப்பூர்வமாக்கப்பட வழிவகுத்த தீவிர பிரச்சாரத்திற்கும் வித்திட்டது.
மேலும், இது மனித உரிமைகளுக்காகப் போராடிய தீவிரவாதக் கட்சியான ‘ரேடிகல் பார்ட்டி’ (Radical Party) மூலம் எம்மா போனினோவை அந்நாட்டு நாடாளுமன்றத்திற்குள் கொண்டு சேர்த்தது.
உறுதியும் துணிச்சலும் கொண்ட போனினோ, சமூக நீதி மற்றும் பாலின சமத்துவத்திற்காக தீவிரமாக குரல் கொடுத்தவர். உள்நாட்டிலும் வெளிநாட்டிலும் தனது இலக்குகளை அடைய சர்ச்சை தரும் வழிகளையும் அவர் துணிச்சலாகக் கையாண்டார்.
“எனது வாழ்நாள் முழுவதும் உரிமைகளுக்காகப் போராடி வருகிறேன்; அவை என்றென்றும் நிலைத்திருக்காது என்பதால் அவற்றைப் பாதுகாக்குமாறு மக்களுக்கு எச்சரித்தும் வருகிறேன்,” என்று 2024-ஆம் ஆண்டு ‘ராய்’ (Rai) அரசுத் தொலைக்காட்சிக்கு அளித்த பேட்டியில் அவர் குறிப்பிட்டிருந்தார்.
ஐந்து தசாப்த கால அரசியல் வாழ்க்கையில், இத்தாலி மற்றும் ஐரோப்பிய ஒன்றிய நாடாளுமன்றங்களுக்கு போனினோ பலமுறை தேர்ந்தெடுக்கப்பட்டார்.
ரோமில் வெளியுறவுத்துறை அமைச்சராகவும் ஐரோப்பிய விவகாரங்கள் துறை அமைச்சராகவும் பணியாற்றிய அவர், பிரஸ்ஸல்ஸில் உயர் பொறுப்பிலிருந்த ஐரோப்பிய ஆணையராகவும் (European Commissioner) சேவையாற்றினார்.
புகைப்பிடிக்கும் பழக்கத்தை கைவிட மறுத்தபோதிலும், நுரையீரல் புற்றுநோயிலிருந்து மீண்டு வந்து, தனது 70-களின் பிந்தைய கால கட்டத்திலும் தீவிர அரசியலில் தொடர்ந்தார்.
கருக்கலைப்பு தொடர்பான இவரது நிலைப்பாட்டிற்கு கத்தோலிக்க திருச்சபை எதிர்ப்பு தெரிவித்தபோதிலும், இத்தாலியில் இவருக்கு இருந்த உயர் மரியாதையை வெளிப்படுத்தும் வகையில், 2024 நவம்பரில் இவருக்கு ஏற்பட்ட கடுமையான உடல்நலக்குறைவின் போது, திருத்தந்தை பிரான்சிஸ் வத்திகானுக்கு வெளியே வந்து இவரது இல்லத்திற்கு நேரில் சென்று நலம் விசாரித்தார்.
இந்நிலையில், போனினோ தனது 78-வது வயதில் வெள்ளிக்கிழமை காலமானார் என்று அவரது செய்தித் தொடர்பாளர் தெரிவித்துள்ளார்.
