காங்கேசன்துறை துறைமுக அபிவிருத்திக்கான புரிந்துணர்வு உடன்பாடு குறித்து ஆராய்வு

இந்திய அரசாங்கத்தின் ஆதரவுடன், காங்கேசன்துறை துறைமுகத்தை அபிவிருத்தி செய்வதற்கான புரிந்துணர்வு உடன்பாட்டை இறுதி செய்வதை விரைவுபடுத்த இலங்கையும் இந்தியாவும் நடவடிக்கைகளை எடுத்துள்ளன.

எரிசக்தி, துறைமுகங்கள் மற்றும் சிவில் விமானப் போக்குவரத்து அமைச்சர், அனுர கருணாதிலக தலைமையில், அவரது பணியகத்தில் இன்று காலை புரிந்துணர்வு உடன்பாடு குறித்த ஒரு சிறப்பு கலந்துரையாடல் நடைபெற்றது.

இலங்கைக்கான இந்திய பிரதி தூதுவர் மைத்ரே குல்கர்னி உள்ளிட்ட இந்திய அரசாங்கத்தைப் பிரதிநிதித்துவப்படுத்தும் ஒரு குழு இந்தக் கலந்துரையாடலில் பங்கேற்றது.

பிரதி அமைச்சர் ஜனித ருவன் கொடிதுவக்கு, அமைச்சின் செயலாளர் டபிள்யூ.டபிள்யூ.எஸ். மங்கள, துறைமுக அதிகார சபையின் தலைவர் மற்றும் மூத்த அதிகாரிகளும் இந்தக் கூட்டத்தில் கலந்து கொண்டனர்.

இலங்கை வெளிவிவகார அமைச்சின் அதிகாரிகளும் உடனிருந்தனர்.

கலந்துரையாடலின் போது, ​​முன்மொழியப்பட்ட புரிந்துணர்வு உடன்பாடு தொடர்பாக, நிலுவையில் உள்ள பல விடயங்கள் குறித்து இரு தரப்பினரும் கவனம் செலுத்தினர்.

இந்த விடயங்கள் விரிவாக கலந்துரையாடப்பட்டதில், பரிசீலனையில் உள்ள விடயங்கள் குறித்து இரு தரப்பினரும் உடன்பாடுகளை எட்டியுள்ளனர்.

காங்கேசன்துறை துறைமுக அபிவிருத்தித் திட்டம், இலங்கைக்கும் இந்தியாவுக்கும் இடையேயான பயணிகள் மற்றும் சரக்குப் போக்குவரத்தை எளிதாக்குவதோடு, இரு நாடுகளுக்கும் இடையேயான கடல்வழி இணைப்பையும் வலுப்படுத்தும் என எதிர்பார்க்கப்படுகிறது.

இந்தத் திட்டத்தின் செயலாக்கத்தை மேற்பார்வையிடவும் கண்காணிக்கவும், ஒரு கூட்டு கண்காணிப்புக் குழு மற்றும் ஒரு தொழில்நுட்பக் குழு ஆகியவற்றை அமைப்பது குறித்தும் முன்மொழியப்பட்டது.

இந்தக் கலந்துரையாடல்களின் முடிவுகளையும் முன்னேற்றத்தையும் இந்திய அரசாங்கத்திடம் கூடிய விரைவில் சமர்ப்பிக்க இந்தியத் தூதுக்குழு ஒப்புக்கொண்டதுடன், இறுதி முடிவு விரைவில் தெரிவிக்கப்படும் என்றும் குறிப்பிட்டுள்ளது.

இந்தத் திட்டம், இந்தியாவுக்கும் இலங்கையின் வடபகுதிக்கும் இடையேயான கடல்வழி உறவுகளை வலுப்படுத்தும், வட மாகாணத்தில் துறைமுக உள்கட்டமைப்பை மேம்படுத்தும் மற்றும் பிராந்திய பொருளாதார நடவடிக்கைகளை அதிகரிப்பதில் பங்களிக்கும் என எதிர்பார்க்கப்படுகிறது.

மேலும், இது தமிழ் மக்கள் உட்பட வட பிராந்தியத்தில் உள்ள சமூகங்களுக்கு, மேம்பட்ட இணைப்பு மற்றும் பொருளாதார வாய்ப்புகளிலிருந்து பயனடைய அதிக வாய்ப்புகளை உருவாக்கும் என்றும் தெரிவிக்கப்பட்டுள்ளது.

கடந்த பெப்ரவரி மாதம், அமைச்சர் அனுர கருணாதிலக காங்கேசன்துறை துறைமுகத்தின் தற்போதைய நிலையை ஆய்வு செய்து, இந்தத் திட்டத்தை விரைவுபடுத்த தேவையான நடவடிக்கைகளை எடுக்குமாறு சம்பந்தப்பட்ட அமைச்சின் அதிகாரிகளுக்கும் துறைமுக அதிகார சபையின் நிர்வாகத்திற்கும் அறிவுறுத்தியிருந்தார்.

இதுதொடர்பான புரிந்துணர்வு உடன்பாடுகளை விரைவில் இறுதி செய்து கையொப்பமிடுவதற்கான ஏற்பாடுகள் செய்யப்பட்டு வருவதாகவும் அவர் அப்போது கூறியிருந்தார்.