இந்தோனேசியாவில் ஒன்லைனில் iPhone வாங்கிய பெண்ணுக்கு காத்திருந்த அதிர்ச்சி

இந்தோனேசியாவில் ஒன்லைனில் iPhone வாங்கிய பெண்ணுக்கு சர்க்கரைப் பொட்டலம் கிடைத்த சம்பவம் ஒன்று இடம்பெற்றுள்ளது.

அந்தப் பெண் இந்தோனேசியாவின் யோக்யக்கார்த்தாவிற்குச் சென்றிருக்கிறார். அவர் இளஞ்சிவப்பு நிறத்தில் iPhone 16 Plus-ஐத் தேடினார்.

அதைக் கடைகளில் கண்டுபிடிப்பது கடினம். அதனால் அதை ஒன்லைனில் வாங்கி அதைத் தம்முடைய வீட்டிற்கு அனுப்பிவைக்க முடிவெடுத்தார்.

வாங்கிய மறுநாள் பொருளும் வந்துசேர்ந்தது. ஆனால் உள்ளே இருந்தது சர்க்கரைப் பொட்டலம். அவர் உடனடியாக விநியோக அலுவலகத்திற்குச் சென்று அதைப் பற்றிக் கேட்டார். ஆனால் அலுவலக ஊழியர்கள் சரியான பதில் தரவில்லை.

பொலிஸாரிடம் முறைப்பாடு செய்தாக கூறிய பின்னர் அலுவலகம் சம்பவத்தை விசாரணை செய்யப்போவதாகக் கூறியது. ஆனால் விசாரணை முடிவுக்கு வருவதுபோல் அந்தப் பெண்ணுக்குத் தெரியவில்லை.

அதற்குப்பின் கைத்தொலைபேசியை விநியோக அலுவலகத்தில் பணிபுரியும் ஊழியர் திருடியது தெரியவந்தது. அந்தப் பெண் கைத்தொலைபேசிக்குச் செலுத்திய தொகை அவரிடம் திரும்பக்கொடுக்கப்பட்டது.