பிரான்ஸை எதிர்கொள்ள அஞ்சுகிறதா ஸ்பெயின் அணி?

உலகக் கோப்பை அரையிறுதிப் போட்டியில் பிரான்ஸ் அணியை எதிர்கொள்வது குறித்து தமக்கு எந்த பயமும் இல்லை என்று ஸ்பெயின் அணியின் இளம் நட்சத்திரம் லமீன் யமால் (Lamine Yamal) உறுதியுடன் தெரிவித்துள்ளார்.

கடந்த வாரம் பெல்ஜியம் அணிக்கு எதிரான கால் இறுதியில் ஸ்பெயின் 2-1 என்ற கணக்கில் வெற்றி பெற்றதைத் தொடர்ந்து, ஸ்பெயினைக் கண்டு பிரான்ஸ் தான் அச்சப்பட வேண்டும் வேண்டும் என்று பார்சிலோனா கிளப்பின் இளம் வீரரான யமால் கூறியதாக வெளியான செய்தி பெரும் பரபரப்பை ஏற்படுத்தியது.

திங்கள்கிழமையன்று நடைபெற்ற செய்தியாளர் சந்திப்பில், மிகவும் நிதானமாகத் தோன்றிய யமால் இக்கருத்துக்கள் குறித்து விளக்கமளித்தார்.

“பிரான்ஸ் அணியைக் கண்டு பயப்படுகிறீர்களா என்று என்னிடம் கேட்கப்பட்டது, அதற்கு நான் ‘இல்லை’ என்று பதிலளித்தேன்,” என்று விளக்கமளித்த யமால், “நாங்கள்தான் தற்போதைய ஐரோப்பிய சாம்பியன்கள் (European Champions). இது வெறும் கால்பந்து ஆட்டம்தான்,” என்றார்.

தனது 19-வது பிறந்தநாளைக் கொண்டாடும் விதமாக, வைரங்கள் பதிக்கப்பட்ட தடிமனான நெக்லஸ் ஒன்றை வாங்கியதாகக் கூறிய யமால், அதை அணிந்தவாறே செய்தியாளர் சந்திப்பில் பங்கேற்றார்.

எனினும், ஞாயிற்றுக்கிழமை நடைபெறவுள்ள உலகக் கோப்பை இறுதிப் போட்டிக்கான தகுதிதான் தனக்கான உண்மையான பிறந்தநாள் பரிசு என்றார்.

“எனக்கு இன்னும் பெரிய பரிசுகள் எதுவும் கிடைக்கவில்லை. செவ்வாய்க்கிழமை போட்டியில் வென்று, நியூயார்க்கிற்குச் செல்வதுதான் எனக்குக் கிடைக்கும் சிறந்த பரிசாக இருக்கும்,” என்று அவர் கூறினார்.

இந்த உலகக் கோப்பையில் மற்ற நட்சத்திர வீரர்கள் பல கோல்களைக் குவித்து வரும் வேளையில், யமால் இதுவரை ஒரு கோல் மட்டுமே அடித்துள்ளார். எனினும், பிரான்சுக்கு எதிரான போட்டியில் தனது கோல் கணக்கை உயர்த்த அவர் தயாராக உள்ளார்.

“நான் கோல் அடிப்பதை மட்டுமே நோக்கமாகக் கொள்வதில்லை. ஆனால் இது போன்றதொரு முக்கியமான போட்டியில் கோல் அடிப்பது எப்போதுமே சிறப்பு வாய்ந்தது. இந்த சவாலை நான் ஏற்றுக்கொள்கிறேன். இதற்காகவே நான் இங்கு வந்துள்ளேன்,” என்று கூறிய யமால், ரசிகர்களுக்கு ஒரு “அழகான ஆட்டத்தை” வழங்குவதாக உறுதியளித்தார்.

உலகக் கோப்பை இறுதிப் போட்டிக்கு ஸ்பெயினே தகுதிபெறும் என்று பிரான்ஸ் பயிற்சியாளர் திதியர் தெஷாம்ப்ஸ் (Didier Deschamps) கூறினாலும், பந்தயச் சந்தைகள் பிரான்ஸ் அணி கோப்பையை வெல்லவே அதிக வாய்ப்பிருப்பதாகக் கணித்துள்ளன.

கைலியன் எம்பாப்பே, மைக்கேல் ஒலிஸ் மற்றும் உஸ்மான் டெம்பேலே போன்ற நட்சத்திர வீரர்களின் அதிரடி ஆட்டத்தால் பிரான்ஸ் அரையிறுதிக்கு முன்னேறியுள்ளது.