உலகளாவிய பாதுகாப்பு வங்கியை அமைக்கிறது கனடா

உலகளாவிய பாதுகாப்பு வங்கி ஒன்றை அமைப்பதற்காக பத்துக்கும் மேற்பட்ட நாடுகளை ஒன்றிணைக்கும் முயற்சியில் கனடா இறங்கியுள்ளது.

அடுத்த வாரம் துருக்கியில் நடைபெறவுள்ள நேட்டோ (NATO) உச்சிமாநாட்டில் இதற்குரிய நகர்வு முன்னெடுக்கப்படும்.

அமெரிக்கா தலைமையிலான பாரம்பரிய உலக ஒழுங்குமுறை உடைந்து வருவதாகக் கருதும் கனடா பிரதமர் மார்க் கார்னி, அதற்கு மாற்றாக ‘நடுத்தர சக்தி நாடுகளின்’ கூட்டணி ஒன்றை உருவாக்க இந்த ஆண்டு அழைப்பு விடுத்திருந்தார்.

அதன் ஒரு பகுதியாக, இந்த ‘ பாதுகாப்பு மற்றும் நெகிழ்ச்சி வங்கி’ (DSRB – Defence, Security and Resilience Bank) திட்டத்தை அவர் ஊக்குவித்து வருகிறார்.

“நேட்டோ உச்சிமாநாட்டை எங்களுக்கான காலக்கெடுவாக நிர்ணயித்துள்ளோம். இந்த மாநாட்டில் வங்கியின் நிறுவன உறுப்பு நாடுகளின் பட்டியலை அறிவிப்பதே எங்கள் இலக்கு,” என்று கனடாவின் பிசினஸ் டெவலப்மென்ட் வங்கியின் தலைமை நிர்வாக அதிகாரியும், இந்த பன்னாட்டுக் கூட்டு முயற்சியின் கனடா நாட்டு முதன்மை பேச்சுவார்த்தையாளருமான இசபெல் ஹூடான் தெரிவித்தார்.

மலிவான நிதியுதவி மூலம் சுமார் 100 பில்லியன் பவுண்டுகள் ($133 பில்லியன் டாலர்) வரை திரட்டி, நட்பு நாடுகளின் பாதுகாப்பை வலுப்படுத்துவதே இந்த வங்கியின் முக்கிய நோக்கமாகும்.

தொடக்கத்தில் இணையவுள்ள நாடுகள் அனைத்தும் கனடாவைத் தவிர ஐரோப்பிய நாடுகளாகவே இருக்க வாய்ப்புள்ளது என்று கூறிய ஹூடான், அவற்றின் பெயர்களைக் குறிப்பிட மறுத்துவிட்டார்.

மூலதனப் பங்களிப்பு உள்ளிட்ட இறுதி கட்ட பேச்சுவார்த்தைகளைப் பொறுத்தே இந்த அதிகாரப்பூர்வ அறிவிப்பு அமையும் என்பதால், இதில் இன்னும் சில மாற்றங்கள் இருக்கலாம் என்றும், எனினும் இத்திட்டம் நல்ல முன்னேற்றம் கண்டுள்ளதாகவும் அவர் குறிப்பிட்டார்.

இருப்பினும், இந்த வங்கிக்கு மிக உயரிய ‘டிரிபிள்-ஏ’ (triple-A) கடன் தரமதிப்பீட்டைப் பெறுவதற்கு முக்கியமான சில நாடுகளின் ஆதரவு இன்னும் கிடைக்காததால், இத்திட்டத்தின் எதிர்காலம் தற்போதைக்கு நிச்சயமற்றதாகவே உள்ளது.