மேற்குக்கரை இஸ்ரேலிய பொருட்களுக்கு பிரித்தானியா தடை விதிப்பு

ஆக்கிரமிக்கப்பட்ட மேற்குக்கரையில் உள்ள இஸ்ரேலிய குடியேற்றப் பகுதிகளில் உற்பத்தி செய்யப்படும் பொருட்களுக்கு வர்த்தகத் தடை விதிக்கப்படும் என பிரித்தானியா செவ்வாய்க்கிழமை அறிவிக்கவுள்ளதாக சிரேஷ்ட அமைச்சர் ஒருவர் தெரிவித்துள்ளார்.

இரு – நாட்டுத் தீர்வுக்குப் பிரித்தானியா
வழங்கும் ஆதரவை மேலும் வலுப்படுத்தும் ஒரு நடவடிக்கையாகவே இது பார்க்கப்படுகிறது.

பிரித்தானியாவின் இந்தத் தலையீட்டை அமெரிக்கா கடுமையாக எதிர்க்கக்கூடும் எனக் கருதப்படுகிறது.

அதேவேளை, இஸ்ரேலின் நிதி அமைச்சர் பெசலெல் ஸ்மோட்ரிச் (Bezalel Smotrich), பிரித்தானியா தூதரை நாட்டிலிருந்து வெளியேற்ற வேண்டும் என கோரிக்கை விடுத்துள்ள நிலையில், அந்நாட்டின் சிலர் ஏற்கனவே இதற்குக் கடும் எதிர்ப்பைப் பதிவு செய்துள்ளனர்.

பிரித்தானியா மற்றும் இஸ்ரேலுக்கு இடையிலான வருடாந்த 6 பில்லியன் பவுண்ட் (8.12 பில்லியன் டொலர்) இருதரப்பு வர்த்தகத்தில் இதன் தாக்கம் மிகக் குறைவாகவே இருக்கும் எனக் கருதப்படுகிறது.

ஏனெனில், மேற்குக்கரை குடியேற்றப் பகுதிகளில் உற்பத்தி செய்யப்படும் பொருட்களையும், இஸ்ரேலில் உற்பத்தி செய்யப்படும் பொருட்களையும் பிரிட்டன் எவ்வாறு வேறுபடுத்தி அடையாளம் காணப் போகிறது என்ற விவரங்கள் இன்னமும் தெளிவாக வெளிவரவில்லை.

கடந்த ஜூலை மாதம் பதவியேற்ற பிரித்தானியப் பிரதமர் ஆண்டி பர்ன்ஹாம் (Andy Burnham), திங்கள்கிழமை அமெரிக்க ஜனாதிபதி டொனால்ட் ட்ரம்புடன் தொலைபேசியில் மத்திய கிழக்கு நிலவரங்கள் குறித்துக் கலந்துரையாடியபோது, “இரு-நாட்டுத் தீர்வின் முக்கியத்துவத்தை” வலியுறுத்தியதாகப் பிரதமர் அலுவலகம் தெரிவித்துள்ளது.

E1 குடியேற்றத் திட்டத்திற்கு பிரித்தானியா எதிர்ப்பு

மேற்குக்கரையில் இஸ்ரேலின் E1 குடியேற்றத் திட்டமே இங்கு முக்கியப் பிரச்சினையாக உருவெடுத்துள்ளது.

இது பாலஸ்தீனர்கள் தங்களது சொந்த நாட்டிற்காகக் கோரும் நிலப்பரப்பைப் பிளவுபடுத்தும் என மிலிபாண்ட் (Miliband) மற்றும் பிற மேலைநாட்டு அரசியல்வாதிகள் சுட்டிக்காட்டியுள்ளனர்.

ஐக்கிய நாடுகள் சபை மற்றும் பிரித்தானியா
உட்படப் பெரும்பாலான அரசாங்கங்கள், மேற்குக்கரையில் உள்ள இஸ்ரேலிய குடியேற்றங்களைச் சட்டவிரோதமானவை என்றும், மேற்குக்கரையை ராணுவ ஆக்கிரமிப்பில் உள்ள ஒரு பிராந்தியமாகவும் கருதுகின்றன.

ஆனால், இந்த நிலப்பரப்பு ஆக்கிரமிக்கப்பட்டது அல்ல; மாறாகச் சர்ச்சைக்குரிய ஒன்று என்று கூறும் இஸ்ரேல், அந்த நிலத்தின் மீது யூதர்களுக்கு வரலாற்றுப் பூர்வமான உரிமை உண்டு என்றும் வாதிடுகிறது.