ஆசிய-பசிபிக் பிராந்தியத்தில் இலங்கைக்கு ஏற்பட்டுள்ள பாதிப்பு!

மேற்காசிய நாடுகளில் நிலவிய தொடர் பதற்றங்களால் ஆசிய-பசிபிக் பிராந்தியத்தில் மிக மோசமாகப் பாதிக்கப்பட்ட நாடுகளில் இலங்கையும் ஒன்றாகும் என்று ஐ.நா அறிக்கையொன்றின் மூலம் தெரிவித்துள்ளது.

மத்திய கிழக்கில் இராணுவ மோதல் அதிகரிப்பு: ஆசியா மற்றும் பசிபிக் முழுவதும் மனித மேம்பாட்டு தாக்கங்கள்” என்ற தலைப்பில் குறித்த அறிக்கை வெளியிடப்பட்டுள்ளது.

அதில்,   2025-ஆம் ஆண்டில் இலங்கையில் இருந்து   வெளியேறும் புலம்பெயர் தொழிலாளர்களில் 80.2 சதவீதம் பேர் மத்திய கிழக்கு நாடுகளுக்குச் செல்வதால், இலங்கை அதிக பாதிப்புக்குள்ளாகியுள்ளது எனத் தெரிவிக்கப்பட்டுள்ளது.

சுற்றுலாப் பயணிகளின் வருகை பிப்ரவரியில் ஒரு நாளைக்கு சராசரியாக சுமார் 9,976 ஆக இருந்த நிலையில் , மார்ச் 1-8, 2026 காலகட்டத்தில் ஒரு நாளைக்கு 5,956 ஆகக் குறைந்துள்ளது, இது ஏறக்குறைய 40 சதவீத வீழ்ச்சியாகும் என்றும் கூறப்பட்டுள்ளது.

வங்கதேசம், இந்தியா மற்றும் பாகிஸ்தான் போன்ற தெற்காசிய அண்டை நாடுகளைப் போலவே, இலங்கையும் வளைகுடாவுடனான ஏற்றுமதி உறவுகள் பலவீனமடைவதால் பொருளாதார நெருக்கடியை எதிர்கொள்கிறது.

இது விவசாய வருமானத்தைக் குறைத்து, அத்தியாவசியப் பொருட்கள் கிடைப்பதைக் கட்டுப்படுத்தி, உற்பத்தியை முடக்கிவிடும் எனவும் சுட்டிக்காட்டப்பட்டுள்ளது.

தேயிலை ஏற்றுமதியில் வாரத்திற்கு 10 முதல் 15 மில்லியன் அமெரிக்க டாலர் வரை இழப்பு ஏற்படும் என மதிப்பிடப்பட்டுள்ளது.