விண்வெளி வீரர்கள் மைதானம் வருகை: நெதர்லாந்து அபார வெற்றி

உலகக் கோப்பை லீக் ஆட்டத்தில், சுவீடன் அணியை 5-1 கோல் கணக்கில் நெதர்லாந்து அணி தோற்கடித்துள்ளது.

இந்த ஆட்டத்தில் கோடி கக்போ (Cody Gakpo) மற்றும் பிரையன் பிராபி (Brian Brobbey) ஆகிய இருவரும் தலா இரண்டு கோல்களை அடித்து அசத்தினர்.

முன்னதாக ஜப்பான் அணிக்கு எதிரான போட்டியில் டிராவைக் கண்ட நெதர்லாந்து அணி, இந்த இமாலய வெற்றியின் மூலம் நாக்-அவுட் சுற்றுக்கு முன்னேறும் வாய்ப்பை பிரகாசப்படுத்திக் கொண்டுள்ளது.

தற்போது Group F பிரிவில் 4 புள்ளிகளுடன் நெதர்லாந்து முதலிடத்திலும், சுவீடன் (3 புள்ளிகள்) இரண்டாமிடத்திலும், ஜப்பான் (1 புள்ளி), துனிசியா (0 புள்ளி) ஆகிய அணிகள் அடுத்தடுத்த இடங்களிலும் உள்ளன.

சுவீடன் அணிக்கு கோல் அடிக்கப் பல வாய்ப்புகள் கிடைத்தன. ஆனால், நெதர்லாந்து கோல்கீப்பர் பார்ட் வெர்ப்ரூஜெனின் (Bart Verbruggen) சிறப்பான தடுப்பாட்டத்தாலும், சுவீடன் முன்கள வீரர்களின் தவறுகளாலும் அவை கைநழுவின.

இரண்டாம் பாதி தொடங்கிய சில நிமிடங்களிலேயே நெதர்லாந்து ஆட்டத்தை முழுமையாகத் தன்வசப்படுத்தியது.

47-வது நிமிடத்தில் டம்ப்ரைஸ் கொடுத்த பந்தைப் பெற்று கக்போ அணியின் 3-வது கோலை அடித்தார்.

பின்னர் 54-வது நிமிடத்தில், சுவீடன் டிபென்டர்களை ஏமாற்றி பந்தை லோ-கார்னரில் (low corner) உதைத்து தனது 2-வது கோலைப் பதிவு செய்தார் கக்போ. இதனால் நெதர்லாந்து 4-0 என வலுவான முன்னிலை பெற்றது.

விண்வெளி நகரமான ஹூஸ்டனில் இந்த ஆட்டம் நடைபெற்றதால், நாசாவின் வரலாற்றுச் சிறப்புமிக்க ‘ஆர்ட்டெமிஸ் II’ (Artemis II) நிலவுப் பயணத்தின் இரண்டு விண்வெளி வீரர்கள் இந்த ஆட்டத்தைக் காண சிறப்பு விருந்தினர்களாக வந்திருந்தனர்.

நெதர்லாந்து மன்னர் வில்லெம்-அலெக்சாண்டரும் மைதானத்திற்கு வருகை தந்து தன் நாட்டு அணியை உற்சாகப்படுத்தினார்.

இந்தத் தோல்விக்குப் பிறகும் சுவீடன் அணி அடுத்த சுற்றுக்கு முன்னேறும் வாய்ப்பில் நீடிக்கிறது. சுவீடன் தனது அடுத்த போட்டியில் ஜப்பானையும், நெதர்லாந்து அணி துனிசியாவையும் எதிர்கொள்ளவுள்ளன.