மத்திய கிழக்கில் தொடரும் பதற்றம் – வளைகுடா நாடுகளின் முக்கிய கூட்டம் ஒத்திவைப்பு

மத்திய கிழக்கில் ஈரான் மற்றும் பிற பாரசீக வளைகுடா நாடுகளுக்கு இடையே திங்கள்கிழமை நடைபெறவிருந்த உயர்மட்டக் கூட்டம் ஒத்திவைக்கப்பட்டுள்ளதால், அப்பகுதியில் இராஜதந்திர முயற்சிகள் பின்னடைவைச் சந்தித்துள்ளன.

அதேவேளையில், உலகின் மிக முக்கியமான இரண்டு எண்ணெய் வர்த்தகப் பாதைகளை ஒட்டிய பகுதிகளில் தொடரும் புதிய தாக்குதல்கள் காரணமாக, சர்வதேச அளவில் எரிபொருள் விநியோகம் பாதிக்கப்படுமோ என்ற அச்சம் தீவிரமடைந்துள்ளது.

உலகின் மிகப்பெரிய எண்ணெய் ஏற்றுமதி நாடான சவுதி அரேபியாவிலிருந்து மேற்கொள்ளப்படும் எரிபொருள் விநியோகத்திற்கு அச்சுறுத்தல் ஏற்பட்டுள்ளதைத் தொடர்ந்து, திங்கள்கிழமை சந்தை தொடங்கியதும் கச்சா எண்ணெய் விலைகள் கணிசமாக உயர்ந்தன.

கடந்த வெள்ளிக்கிழமை ட்ரோன் தாக்குதலில் சேதமடைந்த சவுதி அரேபியாவின் 1,200 கி.மீ (745 மைல்) நீளமுடைய கிழக்கு-மேற்கு பிரதான குழாய் இணைப்பு வார இறுதி முழுவதும் மூடப்பட்டிருந்தது. அப்பகுதியில் இராஜதந்திர ரீதியில் சுமூகத் தீர்வு காண்பதற்கான வாய்ப்புகள் மங்கியுள்ளன.

திங்கள்கிழமை நடைபெறவிருந்த பிராந்திய நாடுகளின் கூட்டம் “அனைத்து தரப்பு உடன்பாட்டைக் கருத்தில் கொண்டு” ஒத்திவைக்கப்பட்டுள்ளதாக ஓமன் வெளியுறவு அமைச்சர் சையத் பத்ர் அல்புசைதி (Sayyid Badr Albusaidi) ஞாயிற்றுக்கிழமை இரவு தெரிவித்தார்.

ஹோர்முஸ் நீரிணையைத் தவிர்த்து மத்திய கிழக்கு கச்சா எண்ணெயைக் கொண்டு செல்வதற்கான முதன்மைப் பாதையாக விளங்கிய தனது குழாய் இணைப்பைத் தற்காலிகமாக மூட சவுதி அரேபியா முடிவெடுத்ததைத் தொடர்ந்து, இந்த ஒத்திவைப்பு அறிவிப்பு வெளியாகியுள்ளது.

இதற்கிடையில், ஹோர்முஸ் ஜலசந்தியில் எண்ணெய் கப்பல்களுக்கான ஆபத்து தொடர்கிறது.

ஞாயிற்றுக்கிழமை ஹோர்முஸ் நீரிணை வழியாகச் சென்ற வணிகக் கப்பல் மீது ஏவுகணை அல்லது குண்டு தாக்கியதில் தீப்பற்றி எரிந்ததாகவும், அதைத் தொடர்ந்து ஊழியர்கள் பாதுகாப்பாக வெளியேற்றப்பட்டதாகவும் பிரித்தானிய கடல்சார் பாதுகாப்பு முகமையான ‘UKMTO’ தெரிவித்துள்ளது.

தொடரும் ஹவுதி கிளர்ச்சியாளர்களின் தாக்குதல்கள்

சவுதி அரேபியாவின் தெற்கு ஜாஸான் (Jazan) மாகாணத்தில், ஏமனின் ஹவுதி கிளர்ச்சியாளர்கள் நடத்திய எல்லை தாண்டிய தாக்குதலில் வீடுகள் மற்றும் பள்ளிவாசல் சேதமடைந்த காட்சிகளை அம்மாநில ஊடகங்கள் வெளியிட்டுள்ளன.

அதேவேளையில், செங்கடலின் நுழைவாயிலான பாப் எல்-மண்டேப் (Bab El-Mandeb) பகுதியில் உள்ள பெரிம் தீவைக் கைப்பற்றியதைத் தொடர்ந்து, அண்டை மாகாணத்தில் உள்ள சவுதி ராணுவத் தளத்தைத் தாக்கியதாக ஹவுதிகள் உரிமை கோரியுள்ளனர்.

செங்கடல் பகுதியில் ஹவுதி கிளர்ச்சியாளர்களின் இந்த முன்னேற்றம், ஏமனில் கடந்த சில ஆண்டுகளில் இல்லாத அளவுக்கு மிகப்பெரிய போராக உருவெடுத்துள்ளது.