மத்தியக் கிழக்கில் புதிய பரிமாணத்தை எடுக்கும் மோதல் போக்கு – ஈரான் எச்சரிக்கை

அமெரிக்காவின் தாக்குதல்கள் தொடர்ந்தால், தற்போதைய மோதல் “ஒரு புதிய பரிமாணத்தை எடுக்கும்” என்று ஈரானிய ஆயுதப் படைகளின் செய்தித் தொடர்பாளர் முகமது அக்ராமியன் கடுமையான எச்சரிக்கை விடுத்துள்ளார்.

டெலிகிராம் சமூக ஊடக தளத்தில் வெளியிட்ட ஓர் அறிக்கையில், “அமெரிக்காவின் ஆக்கிரமிப்பு நடவடிக்கைகள் தொடர்ந்தால், இந்தப் போரை புதிய முனைகளுக்கு விரிவுபடுத்த ஈரான் நடவடிக்கை எடுக்கும்” என்று அவர் கூறினார்.

மேலும், ஈரானிய ஆயுதப் படைகளின் உண்மையான வலிமை மற்றும் திறன்களில் பெரும்பகுதி இன்னும் உலகிற்கு வெளிப்படுத்தப்படவில்லை என்றும் அவர் குறிப்பிட்டுள்ளதாக அந்த அறிக்கையில் தெரிவிக்கப்பட்டுள்ளது.

“ஈரானுக்கு எதிரான எந்தவொரு விரோத நடவடிக்கைக்கும் எங்களின் பதிலடி, தற்போதைய சூழ்நிலையுடன் ஒப்பிடும்போது மிக அதிகமாக இருக்கும். அது எதிரியின் எதிர்பார்ப்புகளை மிஞ்சுவது மட்டுமல்லாமல், மோதலுக்கான புதிய பகுதிகளையும் திறக்கும்” என்றும் அவர் மேலும் கூறினார்.

இந்த அறிக்கையின் மூலம், மத்திய கிழக்கு பிராந்தியத்தில் தற்போது நிலவும் இராணுவ அமைதியின்மை மேலும் தீவிரமடையும் அபாயம் உள்ளது.