ட்ரம்பின் போர் யுக்தி இம்முறை கைகூடுமா?

அமெரிக்க ஜனாதிபதி டொனால்ட் டிரம்ப் ஈரான் மீதான வான்வழித் தாக்குதல்களைப் பல மடங்கு தீவிரப்படுத்தியுள்ளார். அத்துடன் மோதலை மேலும் விரிவுபடுத்தப்போவதாகவும் அச்சுறுத்தியுள்ளார்.

எனினும், தெஹ்ரானை (ஈரான்) பணியவைப்பதில் ஏற்கனவே தோல்வியடைந்த இந்த இராணுவ உத்தி, இந்த முறையும் பலன் தருமா என்பது கேள்விக்குறியாகவே உள்ளது.

இரு தரப்பும் இதுவரை முழு அளவிலான போரைத் தவிர்த்து வந்த போதிலும், இந்த நெருக்கடியிலிருந்து விரைவில் ஒரு தீர்வு கிடைக்கும் என்ற நம்பிக்கை மங்கிப்போயுள்ளது. இந்தச் சூழல் உலகளாவிய கச்சா எண்ணெய் விலையை மீண்டும் உயர்த்தியுள்ளதுடன், நிதிச் சந்தைகளிலும் பெரும் அதிர்வலைகளை ஏற்படுத்தியுள்ளது.

அமெரிக்கா மற்றும் ஈரான் இடையே கடந்த ஆறு நாட்களாகப் பரஸ்பரத் தாக்குதல்கள் தொடர்ந்து நீடித்து வருகின்றன.

டிரம்ப் எச்சரித்தபடி, வாஷிங்டன் ஈரானின் மின்சார உள்கட்டமைப்புகளைத் தாக்கினால், செங்கடலின் நுழைவாயிலில் உள்ள முக்கிய எண்ணெய் கப்பல் போக்குவரத்துப் பாதையான ‘பாப் அல்-மந்தேப்’ (Bab al-Mandeb) ஜலசந்தியை மூடுமாறு ஏமனில் உள்ள தங்களின் ஹவுதி (Houthi) கூட்டாளிகளைத் தூண்டக்கூடும் என்று ஈரான் சூசகமாகத் தெரிவித்துள்ளது.

டிரம்பின் தீவிரத் திட்டங்களும் சவால்களும்

அமெரிக்காவின் அதிருப்தியை வெளிப்படுத்தும் வகையில், ஈரானின் மின் உற்பத்தி நிலையங்கள் மற்றும் பாலங்களைத் தாக்குவது, ஈரானின் ‘கார்க் தீவு’ (Kharg Island) எண்ணெய் மையத்தைக் கைப்பற்றத் தரைப்படைகளை அனுப்புவது மற்றும் ‘பிக்ஆக்ஸ் மவுண்டன்’ (Pickaxe Mountain) என்று அழைக்கப்படும் நிலத்தடி அணுசக்தித் தளத்தின் மீது குண்டுவீசுவது போன்ற தீவிரமான திட்டங்கள் குறித்து டிரம்ப் தனது அதிகாரிகளுடன் ஆலோசித்துள்ளார். சில சமயங்களில் இது குறித்துப் பகிரங்கமாகவும் பேசியுள்ளார்.

இருப்பினும், அதிக ஆபத்துகள் மற்றும் உள்நாட்டு, புவிசார் அரசியல் ரீதியாக ஏற்படக்கூடிய எதிர்மறை விளைவுகள் காரணமாக, இந்த விருப்பங்களில் சில நடைமுறைக்குச் சாத்தியமற்றதாக இருக்கலாம் எனப் பார்க்கப்படுகிறது. டிரம்ப் இதற்கு முன்பும் பலமுறை இதேபோன்ற அச்சுறுத்தல்களை விடுத்து, பின்னர் பின்வாங்கியுள்ளார்.