லெபனான்–இஸ்ரேல் போர் நிறுத்தம் வெற்றியடைந்ததாக ட்ரம்ப் அறிவிப்பு

லெபனான் மற்றும் இஸ்ரேல் 10 நாள் போர் நிறுத்தத்திற்கு ஒப்புக்கொண்டுள்ளதாக அமெரிக்க ஜனாதிபதி டொனால்ட் ட்ரம்ப் அறிவித்துள்ளார்.

லெபனான் மற்றும் இஸ்ரேல் இடையே போர் நிறுத்த ஒப்பந்தம் எட்டப்பட்டதைத் தொடர்ந்து, டொனால்ட் ட்ரம்ப் வெள்ளை மாளிகையில்  பெஞ்சமின் நெதன்யாகு மற்றும் ஜோசப் அவுன் ஆகியோரை நேரில் சந்தித்தார்.

இந்த சந்திப்புக்குப் பிறகு, ட்ரம்ப் இதனை ஒரு முக்கிய வெற்றி என அறிவித்தார்.

தன்னை சமாதானத் தூதராக கருதி பெருமிதம் அடையும்  ட்ரம்ப்  இஸ்ரேல்–லெபனான் போர் நிறுத்தம் தான் முடிவுக்கு கொண்டு வந்த 10வது மோதல் என்றும் கூறினார். ஆனால் இந்தக் கூற்றை பலர் சந்தேகத்துடன் பார்க்கின்றனர்.

நடைமுறையில், இந்த ஒப்பந்தத்தின் தாக்கம் இன்னும் தெளிவாக இல்லை. லெபனானில் வலுவாக செயல்படும் ஹிஸ்புல்லா, அரசின் அதிகாரப்பூர்வ பாதுகாப்பு அமைப்பின் ஒரு பகுதியாக இல்லாததால், அதன் நிலைப்பாடு முக்கியமாக பார்க்கப்படுகிறது.

அவர்கள் போர் நிறுத்தத்தை ஏற்க தயாராக இருப்பதாக தெரிவித்திருந்தாலும், அது இஸ்ரேலின் இராணுவ நடவடிக்கைகள் நிறுத்தப்படுவதையும் சார்ந்துள்ளது.

அதே நேரத்தில், அமெரிக்காவின் செல்வாக்கு இருந்தாலும்,  இஸ்ரேலிய பாதுகாப்புப் படைகள்  தனது நடவடிக்கைகளைத் தொடர வேண்டுமென முடிவு செய்தால், அதனைக் கட்டுப்படுத்துவது சுலபமல்ல.

ஈரான்–அமெரிக்கா உறவுகள் குறித்த பேச்சுவார்த்தைகள் நிச்சயமற்ற நிலையில் இருக்கும் நிலையில், இந்த அறிவிப்பு  ட்ரம்ப்புக்கு அரசியல் ரீதியாக முக்கியமான ஒரு வெற்றியாக பார்க்கப்படுகிறது.