இந்தோனேசியாவில் கோர விபத்து – 10இற்கும் மேற்பட்டோர் பலி

இந்தோனேசியாவில் பரபரப்பான நெடுஞ்சாலை ஒன்றில், திருமண விருந்தினர்களை ஏற்றிச் சென்ற பிக்கப் டிரக் ஒன்று இரண்டு லொரிகளுக்கு இடையில் சிக்கி விபத்துக்குள்ளானதில் 13 பேர் உயிரிழந்துள்ளதுடன், மேலும் 05 பேர் காயமடைந்துள்ளனர்.

இந்த விபத்து , ஜாவா மாகாணத்தின் இந்திரமாயு மாவட்டத்தில் உள்ள நெடுஞ்சாலையொன்றில் இடம்பெற்றுள்ளது.

திறந்தவெளி பிக்கப் டிரக் ஒன்று ‘யு’ திருப்பம் செய்ய முயன்றபோது, ​​ பின்னால் வந்த லொறியுடன் மோதி விபத்துக்குள்ளானதாக தெரிவிக்கப்பட்டுள்ளது.

இந்த பலத்த மோதலின் தாக்கத்தால், பிக்கப் டிரக்கில் இருந்த பத்துக்கும் மேற்பட்டோர் நெடுஞ்சாலையில் தூக்கி வீசப்பட்டதில் பலர் உயிரிழந்துள்ளதாக சுட்டிக்காட்டப்பட்டுள்ளது.

சம்பவம் குறித்த விரிவான விசாரணைகளை பொலிஸார் முன்னெடுத்து வருகின்றனர்.