மொராக்கோவில் பலஸ்தீன ஆதரவு பேரணி – இஸ்ரேலிய மரண தண்டனைச் சட்டத்திற்கு எதிர்ப்பு

மொராக்கோ தலைநகரான ரபாத் நகரில் ஆயிரக்கணக்கான மக்கள் பலஸ்தீனியர்களுக்கு ஆதரவாகவும், இஸ்ரேல் கொண்டு வர முயற்சிக்கும் புதிய மரண தண்டனைச் சட்டத்திற்கு எதிராகவும் பேரணி நடத்தினர்.

முகமது V அவென்யூவில் சுமார் 5,000 பேர் கூடினர். அவர்கள் பலஸ்தீன மற்றும் மொராக்கோ தேசியக் கொடிகளை ஏந்தி, மரண தண்டனைக்கு எதிராகவும், காசாவில் நடைபெறும் போருக்கு எதிராகவும் முழக்கமிட்டனர் என செய்தியாளர்கள் தெரிவித்தனர்.

இந்தப் போராட்டம் “பலஸ்தீனத்திற்கான தேசிய நடவடிக்கைக் குழு” என்ற அமைப்பால் ஏற்பாடு செய்யப்பட்டுள்ளது. இதில் பல்வேறு அரசியல் கட்சிகளைச் சேர்ந்த ஆர்வலர்கள் கலந்து கொண்டனர்.

புதிய சட்டத்தால் ஆபத்தில் உள்ள பலஸ்தீன கைதிகளுக்கு எங்கள் ஆதரவை தெரிவித்துக் கொள்கிறோம், என்று அமைப்பாளர் அஜீஸ் எல் ஹன்னாவி கூறினார்.

இந்தச் சட்டம், பயங்கரவாதம் என்று குற்றம் சாட்டப்பட்ட தாக்குதல்களுக்கு தண்டிக்கப்பட்ட மேற்குக் கரைப் பகுதிகளில் உள்ள பலஸ்தீனியர்களுக்கு மரண தண்டனையை சாதாரண தண்டனையாக மாற்றுகிறது.

மேலும், 2020 ஆம் ஆண்டு தொடங்கப்பட்ட இஸ்ரேல்–மொராக்கோ உறவு இயல்பாக்கத்தையும் போராட்டக்காரர்கள் கடுமையாக விமர்சித்தனர்.