“22” ஆவது திருத்தச்சட்டமூலத்தை மக்கள் தோற்கடிப்பார்கள்: கூட்டு எதிரணி

அரசியலமைப்பின் 22-ஆவது திருத்தச் சட்டமூலமானது ஜனநாயகத்திற்கும், சர்வாதிகாரத்திற்கும் இடையிலான சமராகும். இச்சமரில் சர்வாதிகாரத்தைத் தோற்கடித்து, மக்கள் ஜனநாயகத்தைப் பாதுகாப்பார்கள் என்று முன்னாள் அமைச்சர் ராஜித சேனாரத்ன தெரிவித்துள்ளார்.

இது குறித்து அவர் மேலும் தெரிவிக்கையில்,

“22-ஆவது திருத்தச் சட்டமூலம் தொடர்பில் சர்வஜன வாக்கெடுப்பு நடத்தப்பட வேண்டும். அப்படி நடத்தப்பட்டால் மக்கள் நிச்சயம் அதனைத் தோற்கடிப்பார்கள்.

மாகாணசபைத் தேர்தலை நடத்துவதற்கு இந்த அரசாங்கம் திட்டமிடவில்லை. ஏனெனில், தேர்தலை நடத்தினால் நிச்சயம் தோல்வியடைவோம் என்பது அவர்களுக்கு நன்றாகத் தெரியும்.

குறிப்பாக, 22-ஆவது திருத்தச் சட்டமூலத்தைச் சர்வஜன வாக்கெடுப்பிற்கு உட்படுத்தினால் தற்போதைய நிலைமை என்னவென்பது தெளிவாகத் தெரியவரும். அன்று இருந்த ஜே.வி.பி (JVP) வேறு, இன்று இருக்கும் ஜே.வி.பி வேறு. இதனால் அவர்களின் ஆதரவாளர்கள் மத்தியிலேயே பெரும் அதிருப்தி நிலவி வருகிறது.

மேலும், இலங்கைச் சட்டத்தரணிகள் சங்கத்தின் தலைவருக்கு எதிராகக் குழுவொன்று போராட்டத்தில் ஈடுபட்டு வருகிறது. இந்தப் போராட்டத்தின் பின்னணியில் தற்போதைய அரசாங்கமே செயற்பட்டு வருகிறது” என்று ராஜித சேனாரத்ன குற்றம் சாட்டினார்.