சிரிய இராணுவத்துடன் இணைவு: குர்திஷ் தலைமையிலான SDF படை கலைப்பு

சிரியாவின் புதிய ஜனாதிபதி அகமது அல்-ஷாரா (Ahmed al-Sharaa) தலைமையிலான அரசாங்கத்துடன் எட்டப்பட்ட ஒருங்கிணைப்பு ஒப்பந்தத்தின் ஒரு பகுதியாக, குர்திஷ் தலைமையிலான ‘சிரிய ஜனநாயகப் படைகள்’ (SDF) கலைக்கப்படுவதாக அதன் தலைவர் மஸ்லூம் அப்தி (Mazloum Abdi) அறிவித்துள்ளார்.

சிரியாவில் ஐஎஸ்ஐஎல் (ISIS) பயங்கரவாத அமைப்பிற்கு எதிரான போரில் முன்னின்று செயல்பட்ட SDF அமைப்பு, சிரிய இராணுவத்துடன் முழுமையாக இணைக்கப்பட்டு விட்டதாக டமாஸ்கஸில் உள்ள ஜனாதிபதிமாளிகையில் செவ்வாய்க்கிழமை நடைபெற்ற செய்தியாளர் சந்திப்பில் அப்தி உறுதிப்படுத்தினார்.

சிரியாவின் வடகிழக்கு பகுதியில் தன்னாட்சி அதிகாரத்துடன் செயல்பட்டு வந்த இந்த அமைப்பு, கடந்த ஜனவரி மாதம் சிரிய அரசுப் படைகள் மேற்கொண்ட தாக்குதலைத் தொடர்ந்து பெரும்பாலான பகுதிகளை இழந்தது. அதன் பின்னர், குர்திஷ் மக்களின் கலாச்சார, சிவில் மற்றும் கல்வி உரிமைகளுக்கு அங்கீகாரம் அளிக்கும் வகையில் இந்த இணைப்பு ஒப்பந்தம் கையெழுத்தானது.

சிரிய வரலாற்றில் புதிய அத்தியாயம்

நிகழ்வில் உரையாற்றிய மஸ்லூம் அப்தி, “சிரிய வரலாற்றில் ஒரு முக்கியமான பக்கத்தை முடிவுக்குக் கொண்டுவந்து அமைதி, ஸ்திரத்தன்மை மற்றும் மறுசீரமைப்புக்கான புதிய பக்கத்தைத் தொடங்கும் வரலாற்றுச் சிறப்புமிக்க தருணத்தில் இன்று நாம் நிற்கிறோம்.

இந்த நாள் போர்க்களங்களில் இருந்தான மாற்றத்தின் தொடக்கமாகவும், ஆயுதங்களின் சகாப்தத்தில் இருந்து அமைதியின் சகாப்தத்திற்கான தொடக்கமாகவும் அமைய வேண்டும் என விரும்புகிறோம்” என்று தெரிவித்தார்.

முன்னதாக, சிரியாவில் ஐஎஸ்ஐஎல் அமைப்பிற்கு எதிரான போரில் அமெரிக்காவின் முக்கிய கூட்டாளியாக SDF திகழ்ந்தது. எனினும், டிசம்பர் 2024-ல் பஷார் அல்-அசாத் ஆட்சி வீழ்த்தப்பட்டதைத் தொடர்ந்து, டமாஸ்கஸில் பொறுப்பேற்ற அல்-ஷாரா தலைமையிலான புதிய அரசாங்கத்துடன் அமெரிக்கா நெருக்கமான உறவை ஏற்படுத்திக் கொண்டது.