தேவைக்கு அதிகமாகவே வெளிநாடுகளுக்கு செல்லும் நாடாளுமன்ற அதிகாரிகள்!

நாடாளுமன்ற செயலகத்தின் அதிகாரிகள் தேவைக்கு அதிகமாக வெளிநாடுகளுக்குச் செல்வதாக சபைத் தலைவர் அமைச்சர் பிமல் ரத்நாயக்க நேற்று  பிற்பகல் நாடாளுமன்றத்தில் தெரிவித்தார்.

சில அதிகாரிகள் பல வெளிநாட்டுப் பயணங்களை மேற்கொண்டிருந்தாலும், நாட்டின் நலனுக்காக அவர்கள் ஒரு பயனுள்ள திட்டத்தையும் முன்வைக்கவில்லை என்று அவர் குறிப்பிட்டார்.

பாராளுமன்றத்தில் திறமையான அதிகாரிகள் இருந்தாலும், பலர் ஒருபோதும் வெளிநாட்டுக்குச் சென்றதில்லை என்றும் சலுகைகளைப் பற்றி மட்டுமே அக்கறை கொண்ட ஒரு சிறிய குழு அதிகாரிகள் பாராளுமன்றத்தில் உள்ளதாகவும் அவர் விமர்சித்துள்ளார்.

இந்த பாராளுமன்றம் மக்களின் ஆணையுக்கு உட்பட்டது என்பதை வலியுறுத்தினார்.

நாடாளுமன்ற சம்பளம் மற்றும் பிற செயல்பாடுகளை மறுசீரமைத்தல் பிரச்சினையில், மேல்முறையீடுகள் அடங்கிய தொடர்புடைய அறிக்கையை சமர்ப்பிக்குமாறு சபாநாயகர் செப்டம்பர் 30 அன்று நாடாளுமன்றச் செயலாளர் நாயகத்திற்கு அறிவுறுத்தியிருந்தாலும், அது இன்னும் சமர்ப்பிக்கப்படவில்லை என்றும், அந்த அதிகாரி ஏன் இணங்கத் தவறிவிட்டார் என்றும் பிமல் ரத்நாயக்க கேள்வி எழுப்பியுள்ளார்.