ஆர்க்டிக் பிராந்தியத்தில் புதிய போட்டி: நேட்டோ – ரஷ்யா இடையே மோதல் சூழல்

ஆர்க்டிக் (Arctic) துருவப் பகுதியில் நேட்டோ (NATO) அமைப்பின் இராணுவ நடவடிக்கைகள் அதிகரித்து வருவது ரஷ்யாவின் பாதுகாப்பிற்கு நேரடியாக விடுக்கப்படும் அச்சுறுத்தல் என ரஷ்ய வெளியுறவுத் துறை அமைச்சர் செர்ஜி லாவ்ரோவ் (Sergei Lavrov) சுட்டிக்காட்டியுள்ளார்.

உக்ரைன் மீதான ரஷ்யாவின் போரைத் தொடர்ந்து நேட்டோ உறுப்பு நாடுகள் அப்பகுதியில் தங்களது இராணுவப் பங்களிப்பை அதிகரித்து வரும் பின்னணியில் இந்த எச்சரிக்கை விடுக்கப்பட்டுள்ளது.

ரஷ்யாவுடனான பதற்றமான சூழல் மற்றும் கிரீன்லாந்தை (Greenland) கையகப்படுத்துவது தொடர்பான அமெரிக்க ஜனாதிபதி டொனால்ட் டிரம்பின் முயற்சி ஆகியவற்றிற்கு மத்தியில், ஆர்க்டிக் பகுதியில் தனது கவனத்தை தீவிரப்படுத்தும் நோக்கில் ‘ஆர்க்டிக் சென்ட்ரி’ (Arctic Sentry) என்ற சிறப்புப் பணியை நேட்டோ கடந்த பெப்ரவரி மாதம் தொடங்கியது.

அணுஆயுதப் போர்க் கப்பல்கள் உள்ளிட்ட சக்திவாய்ந்த கடற்படையைக் கொண்டுள்ள ரஷ்யா, ஆர்க்டிக் பகுதியைத் தனது முக்கிய நலன்சார் மண்டலமாகக் கருதுவதோடு, ஆசிய நாடுகளுடன் வணிகத் தொடர்பை ஏற்படுத்த உதவும் முக்கியக் கடல்சார் கப்பல் பாதையையும் அங்கு மேம்படுத்தி வருகிறது.

முன்னதாக ‘ஆர்க்டிக் சென்ட்ரி’ நடவடிக்கைக்கு எதிர்ப்புத் தெரிவித்திருந்த ரஷ்யா, அப்பகுதியில் நேட்டோ நடத்தும் இராணுவப் பயிற்சிகள் ‘அக்கிரமமானவை’ என்று லாவ்ரோவ் குறிப்பிட்டுள்ளார்.

“வட துருவப் பகுதியில் மேற்கொள்ளப்படும் இத்தகைய இராணுவ நடவடிக்கைகள் ரஷ்யாவின் பாதுகாப்பிற்கு நேரடி அச்சுறுத்தலை ஏற்படுத்துகின்றன.

மேலும், பேரழிவை ஏற்படுத்தக்கூடிய ஆயுத மோதலுக்கு வழிவகுக்கும் அசம்பாவிதங்கள் நிகழும் அபாயமும் அதிகரித்து வருகிறது” என்று ரஷ்ய வெளியுறவு அமைச்சகம் வெளியிட்ட கட்டுரையில் அவர் எச்சரித்துள்ளார்.

ஆர்க்டிக் பகுதியில் மிகப்பெரிய இராணுவப் பிரசன்னத்தையும் பரந்த உள்கட்டமைப்புகளையும் ரஷ்யா கொண்டுள்ள நிலையில், வளம் நிறைந்த அப்பகுதியில் சீனாவுடனும் இணைந்து தனது கூட்டு நடவடிக்கைகளை ரஷ்யா அண்மைக்காலமாக அதிகரித்து வருகிறது.

உக்ரைன் போரைத் தொடர்ந்து, ரஷ்யாவின் அண்டை நாடும் நேட்டோ உறுப்பினருமான நார்வே, ஆர்க்டிக் பகுதியைத் தலைமையிடமாகக் கொண்ட தனது இராணுவப் பிரிவை இந்த மாதம் விரிவுபடுத்தியுள்ளது.

இருப்பினும், நேட்டோ அமைப்பிற்குத் தான் எந்தவித அச்சுறுத்தலையும் ஏற்படுத்தவில்லை என்று மாஸ்கோ தொடர்ச்சியாகக் கூறி வருகிறது.