தமிழகத்துக்காகவே மேகேதாட்டு அணை கட்டுகிறோம்: கர்நாடக முதல்வர்
“மேகேதாட்டு அணை கர்நாடகாவுக்காக அல்ல, தமிழகம் மற்றும் புதுச்சேரியின் பயன்பாட்டுக்காகவே கட்டப்படவுள்ளது” என கர்நாடக முதல்வர் டி.கே சிவக்குமார் தெரிவித்துள்ளார்.
கோவளத்தில் நேற்று நடைபெற்ற தென்மாநில முதல்வர்கள் மாநாட்டில் பங்கேற்று உரையாற்று கையிலேயே அவர் இவ்வாறு கூறினார்.
” இந்தியாவின் மொத்த உள்நாட்டு உற்பத்தியில் 33 சதவீதத்துக்கும் அதிகமாக தென்மாநிலங்கள் பங்களிக்கின்றன. இதில் கர்நாடகா, நாட்டின் மென்பொருள் ஏற்றுமதியில் 42 சதவீதத்தையும், விமானத் துறையில் 60 சதவீதத்தையும் அளிக்கிறது.
இருப்பினும், 15-வது நிதியமைப்பில் கர்நாடகாவுக்கான நிதிப் பகிர்வு 4.7 சதவீதத்திலிருந்து 3.6 சதவீதமாகக் குறைக்கப்பட்டதால், ரூ. 65ஆயிரம் கோடி இழப்பு ஏற்பட்டுள்ளது.
நாட்டின் வளர்ச்சிக்கு அதிகப் பங்களிக்கும் மாநிலங்கள் தண்டிக்கப்படக் கூடாது; தற்போதைய இடங்களின் எண்ணிக்கையிலேயே உடனடியாக நடைமுறைப்படுத்த வேண்டும்.” எனவும் அவர் குறிப்பிட்டுள்ளார்.
பிறகு அவர் செய்தியாளர்களிடம் கூறுகையில்,
“தொகுதி மறுவரையறை நடவடிக்கைகளில், 1971-ம் ஆண்டு மக்கள் தொகைக் கணக்கெடுப்பையே அடிப்படையாகக் கொள்ள வேண்டும் என்றும் தென் மாநிலங்களின் நாடாளுமன்றப் பிரதிநிதித்துவம் பாதிக்கப்படக் கூடாது என்றும் மத்திய உள்துறை அமைச்சரிடம் வலியுறுத்தப்பட்டுள்ளது.
மேகேதாட்டு அணை கட்டுவது கர்நாடகாவுக்காக அல்ல; தமிழகம் மற்றும் புதுச்சேரியின் பயன்பாட்டுக்காகவே கட்டப்பட உள்ளது. மாநிலங்களுக்கு இடையேயான நதிநீர் விவகாரங்கள் தொடர்பாகத் தனியாகக் கூட்டம் கூட்டி, சுமுகமான முறையில் தீர்வுகாண ஒப்புக்கொள்ளப்பட்டுள்ளது” என்றார்.
